ރާއްޖެއަށް ކްރިޕްޓޯ ކަރަންސީ ގެނައުމުގެ އަމަލީ މަސައްކަތް ފަށައިފި
ރާއްޖެއަށް ކްރިޕްޓޯކަރަންސީ ތައާރަފު ކުރުމަށް ކަމާ ގުޅުންހުރި އަމަލީ މަސައްކަތް ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ގައުމީ ޔުނިވާސިޓީގެ ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ އދ. އަށް ވަޑައިގެން ދެއްވި ތަގުރީރުގައި ފާހަގަކުރައްވާފައިވާ ފަދައިން އިގުތިސޯދީ ކަންކަން ފުޅާކުރުމަށް ކުރާ މަސައްކަތުގެ ތެރެއިން އިގުތިސޯދުގެ 15 އިންސައްތަ ޑިޖިޓަލް ކުރުމަށް 2030 ވަނަ އަހަރާ ހަމައަށް ދާއިރަށް މަސައްކަތް ކުރައްވާނެ ކަމަށެވެ.
އެގޮތުން ކުރަމުން އަންނަ މަސައްކަތްތަކުގެ ތެރެއިން ޑިޖިޓަލް ކަރަންސީ ރާއްޖެއަށް ތައާރަފު ކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރަށް މިހާރު ދަންނަވާފައިވާ ކަމަށެވެ.
"ކްރިޕްޓޯކަރަންސީ ރާއްޖެއަށް ތައާރަފު ކުރުމަށް ޓަކައި މަސައްކަތްތައް ފަށަން. އެ މަސައްކަތާ ގުޅޭ އަމަލީ މަސައްކަތްތަކުގައި މިހާރު އެމްއެމްއޭ ގަވަރުނަރު މަސައްކަތް ފަށައިފި،" ރައީސް ވިދާޅުވި އެވެ.
ކްރިޕްޓޯ ކަރަންސީ ރާއްޖެއަށް ގެންނާނީ އެކަން ފުޅާކުރެވޭނެ ގޮތް ބަލައިގެން ބައިނަލްއަގުވާމީ ގޮތުން އެކަމަށް އެކަށައަޅާފައިވާ މިންގަނޑުތަކާ އަދި ކަމަށް ބޭނުންވާ ގާނޫނީ ހުރިހާ ކަމަކަށް ހައްލު ލިބޭނެ ގޮތަށް ހާއްސަ ގާނޫނެއް ހަދައިގެން ކަމަށެވެ.
ރައީސް ވިދާޅުވި ގޮތުގައި މިފަދަ ކަންކަމަކީ ކިޔަވައިގެން ނިކުންނަ ކުދިންނާއި ޒުވާނުންނާ އަދި ފަންނުވެރިން އިގުތިސޯދީ އެކި ކަންކަމުގައި ހަރަކާތްތެރި ވުމަށް ހުރި ފުރުސަތުތައް ކަމުގަ އެވެ. ޑިޖިޓަލައިޒޭޝަނުގެ ތެރެއިން ކުރިއަށް އޮތްތަނުގައި ރާއްޖެ ވާނީ ބައިނަލްއަގުވާމީ ގޮތުން އެފަދަ ކަންކަމުގެ ކުރީ ސަފުގައި ފާހަގަކުރެވޭ ގައުމަކަށް ކަމުގަ އެވެ.
