އާއިލާގެ ކުއްޖަކަށް ގޯނާކުރި މީހަކު 20 އަހަރަށް ޖަލަށްލައިފި
އާއިލާގެ ކުއްޖަކަށް ޖިންސީ ގޯނާކުރި މީހަކު 20 އަހަރަށް ޖަލަށްލައިފި އެވެ.
އިއްޔެ ކްރިމިނަލް ކޯޓުން ހުކުމްކޮށްފައިވަނީ އުތުުރުގެ ރަށެއްގެ ހުސައިން އަލީފް ކިޔާ މީހެއްގެ މައްޗަށެވެ.
އެ މައްސަލާގައި އަލީފްގެ މައްޗަށް އާއިލާގެ ކުޑަ ކުއްޖަކާއެކު ޖިންސީ އަމަލެއް ހިންގުމުގެ ކުށުގެ ދައުވާ އުފުލީ 2018 ވަނަ އަހަރެވެ.
އެ ދައުވާއާ ގުޅިގެން ދައުލަތުން ހުށަހެޅި ހެކިގަރީނާއަށް ބަލާއިރު އެކަށީގެންވާ ޝައްކެއް ނެތް މިންވަރަށް، އޭނާގެ މައްޗަށް އެ ދައުވާ ސާބިތުވާ ކަމަށް ކްރިމިނަލް ކޯޓުން ކަނޑައެޅި އެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު 15 ވަނަ މާއްދާގެ (ހ) ގެ ދަށުން އަލީފަށް ހުކުމްކުރި އިރު, އެ މާއްދާގެ (ށ) ގައި ބުނެފައިވަނީ އެކުށުގެ އަދަބަކީ 20 އަހަރާއި 25 އަހަރާ ދެމެދުގެ މުއްދަތަކަށް ޖަލަންލުމެވެ.
ކުޑަކުއްޖަކު ހިމެނޭ މައްސަލައަކަށް ވާތީ މައްސަލައިގެ މުޅި ރިޕޯޓު ކްރިމިނަލް ކޯޓުގެ ވެބްސައިޓްގައި ޝާއިއުކޮށްފައެއް ނުވެ އެވެ. އަދި ކުޑަކުދިންގެ ޖިނާއީ މައްސަލަތަކުގައި ތަފުސީލާ ކުއްޖާގެ ވަނަވަރު ހާމަކުރުން ގާނޫނުގައި މަނާކޮށްފައިވެ އެވެ.
