ރައީސް ކަންކަން ކުރައްވަނީ ވިދާޅުވާ ގޮތާ އިދިކޮޅަށް: ފައްޔާޒު
ރައީސް ޑރ. މުހައްމަދު މުއިއްޒު ވަރަށް ގިނަ ކަންކަން ކުރައްވަނީ ވިދާޅުވާ ގޮތާ އިދިކޮޅަށް ކަމަށް އިދިކޮޅު މައި ޕާޓީ އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެ އެވެ.
ފައްޔާޒު ރޭ އެހެން ވިދާޅުވީ "އެކްސް" ގައި ރައީސް ކުރެއްވި ޕޯސްޓެއް ޝެއާކުރެއްވުމަށްފަހު އެވެ.
އާބަން ސެންޓަރުތަކުގެ ގޮތުގައި ކަނޑައެޅި 7 ރަށަކާމެދު އެމްޑީޕީން ކަންބޮޑުވުން ފާޅުކުރަނިކޮށް ރައީސް ވިދާޅުވީ މާލެއިން އުތުރުން 3 އާބަން ސެންޓަރަކާއި މާލެއިން ދެކުނުން 4 އާބަން ސެންޓަރެއް ހިމެނޭ ގޮތަށް 7 އާބަން ސެންޓަރު ތަރައްގީކުރުން އެއީ ސަރުކާރުގެ ސިޔާސަތެއް ކަމަށެވެ.
އެކަމަކީ އެމަނިކުފާނުގެ މެނިފެސްޓޯގައި (ޗެޕްޓާ 4، ނަންބަރު 12، 13 އަދި 14 ގައި) އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި ދައްކަވާފައިވާ ވާހަކަ ކަމަށް ރައީސް ވިދާޅުވި އެވެ.
"އެތައް ޖަލްސާއެއްގައި ވިދާޅުވެ މެނިފެސްޓޯގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ވަރަށް ގިނަ ކަންކަން ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ހިލާފަށް"
ފައްޔާޒު ވިދާޅުވީ އިއްޔެ ސަރުކާރުން 7 ރަށެއް އާބަން ސެންޓަރުގެ ގޮތުގައި ތަރައްގީ ކުރަން އިއުލާނު ކުރީ އެއްވެސް މަޝްވަރާއެއް އަދި ރައްޔިތުންގެ ހިޔާލު ހޯދުމެއް ނެތި ކަމަށެވެ.
އޭގެ އިތުރުން ގައުމީ ތަރައްގީގެ 20 އަހަރުގެ މާސްޓާޕްލޭން ވެސް އެކުލަވާލާނީ އެހެން ކަމަށާއި އެ ޕްލޭނާ އެއްގޮތަށް ކަންކަން ވެސް ނުކުރައްވާނެކަން ދިވެހި ރައްޔިތުންނަށް މިއަދު ޔަގީންވާ ކަމަށް ފައްޔާޒު ވިދާޅުވި އެވެ.
"ހުއްޓުމެއް ނެތި ހައްދަވަނީ ހުސް ދޮގު."
އާބަން ސެންޓަރު އަޅަން ކަނޑައަޅާފައިވަނީ ރ. އުނގޫފާރު, ބ. އޭދަފުށީ, ޅ. ނައިފަރު, އދ. މަހިބަދޫ, ފ. ނިލަންދޫ, ދ. ކުޑަހުވަދޫ އަދި ލ. ފޮނަދޫ އެވެ.
ރައީސް މުއިއްޒު ވިދާޅުވެފައިވާ ގޮތުން އާބަން ސެންޓަރުގައި ސިއްހީ ނިޒާމުގެ ތެރެއިން އެންމެ މުހިންމު ހުރިހާ ދާއިރާއަކުން ހިދުމަތް ދެވެން ހުންނާނެ ކަމަށެވެ.
އެގޮތުން އެކިކަހަލަ ތެރެޕީތައްވެސް ދެވޭނެކަމަށްވެސް ރައީސް ފާހަގަކުރެއްވި އެވެ. އަދި ތައުލީމީ ނިޒާމުވެސް އެންމެ މަތީ ފެންވަރުގައި ގާއިމުކުރައްވާނެކަމަށާއި، މަގުތައްވެސް އެންމެ ރަނގަޅަށް ހަދައި އަދި ދެންހުރި ކަންކަން ވެސް އެންމެ ރަނގަޅަށް ގާއިމުކުރެވިފައި ހުންނާނެކަމަށްވެސް ރައީސް ވަނީ ވިދާޅުވެފަ އެވެ.
ފިތުނަނުއުފައްދާ ތިބެބަލަ ވެރިކަން ކޮށްލާނެ ސަޅިގޮތް ބަލަން