ގުޅިން ޗިކެންޕޮކްސްގެ 11 ކޭސްއެއް
ކ. ގުޅިން ޗިކެންޕޮކްސް (ފާނަބަސަނދު) ގެ ކޭސްތަކެއް ފެނިއްޖެ އެވެ.
އާބާދީގައި 1،000 އެއްހާ މީހުން ދިރިއުޅޭ ގުޅިން ޗިކެންޕޮކްސްގެ 11 ކޭހެއް ފެނިފައިވާ ކަމަށް ހެލްތު މިނިސްޓްރީގެ އޮފިޝަލަކު "ދެން" އަށް ޔަގީން ކޮށްދީފައިވެ އެވެ.
"ދެން" އަށް މައުލޫމާތު ދެއްވަމުން ގުޅީ ކައުންސިލްގެ ނައިބު ރައީސް އިބްރާހިމް ފާއިޒު ވިދާޅުވީ، ބަލި ޖެހުނު މީހުންގެ ތެރެއިން ވަރުސެލާ ނިއުމޯނިއާއަށް ޝައްކު ކުރެވިގެން 2 މީހަކަށް މިހާރު އައިޖީއެމްއެޗް ހޮސްޕިޓަލުގައި ފަރުވާ ދެމުންދާ ކަމަށެވެ.
އެނގިފައިވާ ގޮތުން އެ 2 މީހުނަށް ފަރުވާދެމުންދަނީ ޗިކަން ޕޮކްސްގެ ޒަރިއްޔާއިން ޖެހޭ ވަރުސެލާ ނިއުމޯނިއާއަށެވެ. އައިޖީއެމްއެޗްއަށް ގުޅޭގޮތް ނުވުމުން މިކަމާ ގުޅިގެން އިތުރު މައުލޫމާތެއް ލިބިފައެއް ނުވެ އެވެ.
ރާއްޖޭގައި ދޭތެރެ ދޭތެރެއިން ޗިކެންޕޮކްސްގެ ކޭސްތައް އިތުރުވެ އެވެ. އެގޮތުން މި އަހަރު ކުރީކޮޅު ވެސް ޗިކެން ޕޮކްސް ފެތުރެމުންދާތީ، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ސަމާލުވާން އެދިފައިވެ އެވެ.
ހެލްތުގެ އޮފިޝަލް ވިދާޅުވީ، ޗިކެންޕޮކްސްގެ ކޭސްތައް މިފަހުން އިތުރުވަމުން އަންނަ ކަމަށެވެ. އަދި ޗިކެންޕޮކްސް ޖެހިފައި ތިބޭ މީހުންނަށް ޖެހޭ ބައްޔެއް ކަމަށްވާ ވަރުސެލާ ނިއުމޯނިއާގެ ކޭސްތައް ވެސް މިހާރު ފެންނަމުންދާ ކަމަށް އޮފިޝަލް ވިދާޅުވި އެވެ.
ވަރުސެލާ ނިއުމޯނިއާއަކީ، ޗިކެންޕޮކްސް ޖެހޭ 400 މީހުންގެ ތެރެއިން، ގާތްގަނޑަކަށް އެކަކަށް އެ އިންފެކްޝަންގެ އަސަރު ކޮށްފާނެ ކަމަށް ދިރާސާތަކުން ދައްކާ އިންފެކްޝަނެކެވެ. އެ ބަލި ޖެހުމުގެ ސަބަބުން ނޭވާލާން އުނދަގޫވެ، ވެންޓިލޭޓަރަށް ލުމުގެ ފުރުސަތު ބޮޑުވެ އެވެ.
މީގެކުރިން ވެސް ޗިކެންޕޮކްސްގެ ކޭސްތައް އިތުރުވާ ދުވަސްވަރާ ދިމާކޮށް ރާއްޖޭގައި ވަރުސެލާ ނިއުމޯނިއާގެ ކޭސްތައް ފެނިފައިވެ އެވެ.
