މޫސުން ގޯސްވާނެކަމަށް ލަފާކޮށް ށ އިން ބ އަށް ޔެލޯ އެލާޓް ނެރެފި
މޫސުން ގޯސްވާނެކަމަށް ލަފާކޮށް ށ. އަތޮޅުން ފެށިގެން ބ. އަތޮޅަށް ޔެލޯ އެލާޓް ނެރެފި އެވެ.
މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ބުނީ އެ ސަރަހައްދަށް ޔެލޯ އެލާޓް ނެރިފައިވަނީ މިއަދު ހެނދުނު 7:15 އިން މެންދުރު 11:00 އަށް ކަމަށެވެ.
މި ވަގުތުގައި މި ސަރަހައްދަށް ބޯކޮށް ވާރޭވެހި ގުގުރުމާއެކު، ކަނޑުތައް ގަދަވާނެ ކަމަށް މެޓުން ލަފާކޮށްފައި ވެއެވެ.
މެޓުން ބުނީ މި ވަގުތުގައި ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށެވެ.
މެޓުން ބުނީ މިހާރު ކުރަމުންދާ ވިއްސާރައަކީ ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރާއި ރާއްޖޭގެ ސަރަހައްދުގައި އުފެދިފައިވާ ލޯ ލެވެލް ސާކިއުލޭޝަނާއި ގުޅިގެން ކުރަމުންދާ ވިއްސާރައެއް ކަމަށެވެ.
މި ހަފްތާ ފެށުނުއިރުއްސުރެން ރާއްޖޭގެ އެކި ހިސާބުތަކަށް ދަނީ ވިއްސާރަ ކުރަމުންނެވެ. އެގޮތުން މިދިޔަ 24 ގަޑިއިރު ތެރޭގައި އެންމެ ގިނަ ވާރޭވެހުނީ ނ. މާފަރަށް ކަމަށް މެޓުން ބުންޏެވެ.
