އަލީ ޔޫސުފް އާއި މަރީގެ ދައުރު ހަމަވާތީ ބްރޯޑްކޮމަށް ކުރިމަތިލާން އަލުން ހުޅުވާލައިފި
މޯލްޑިވްސް ބްރޯޑްކާސްޓިން ކޮމިޝަނުގެ (ބްރޯޑްކޮމް) ގެ ރައީސާ, މަރިޔަމް ވަހީދާއާއި އެ ކޮމިޝަންގެ މެންބަރު އަލީ ޔޫސުފްގެ މެންބަރުކަމުގެ ދައުރު ހަމަވާތީ ކޮމިޝަންގެ މެންބަރުކަމަށް ކުރިމަތިލުމުގެ ފުރުސަތު އަލުން ހުޅުވާލައިފި އެވެ.
ބްރޯޑްކޮމްގެ މެންބަރުކަމަށް ކުރިމަތިލުމަށް ފުރަތަމަ އިއުލާނުކުރީ މި މަހުގެ 18 ވަނަ ދުވަހެވެ. އެ އިއުލާނުގެ މުއްދަތު ހަމަވެފައިވަނީ މި މަހުގެ 26 ވަނަ ދުވަހަށެވެ.
ރައީސް އޮފީހުން މިއަދު ބުނީ ކުރިން ކުރި އިއުލާނު ބާތިލުކޮށް އަލުން ހުޅުވާލި ކަމަށެވެ. އަދި އެ ފުރުސަތު މިއަދުން ފެށިގެން އަންނަ މަހުގެ 9 ވަނަ ދުވަހުގެ 12 ޖެހުމުގެ ނިޔަލަށް ހުޅުވާލާފައިވާ ކަމަށް ރައީސް އޮފީހުން ބުނެ އެވެ.
ރައީސް އޮފީހުން ބުނީ ބްރޯޑްކޮމްގެ މެންބަރުކަމުގެ މަގާމަށް ކުރިމަތިލުމުގެ ފޯމު ރައީސް އޮފީހުގެ ރިސެޕްޝަނުންނާއި ވެބްސައިޓުން ލިބެން ހުންނާނެ ކަމަށާއި އެ ދެ މަގާމަށް ކުރިމަތިލާން އެދޭ ފަރާތްތަކުގެ ފޯމު ރަސްމީ ބަންދު ދުވަސްތައް ފިޔަވާ ކޮންމެ ދުވަހަކު ހެނދުނު 8:30 އިން މެންދުރު 12 ޖެހުމުގެ ނިޔަލަށް އެ އޮފީހުން ބަލައިގަންނާނެ ކަމަށެވެ.
ޕަބްލިސް ސާވިސް މީޑިޔާ (ޕީއެސްއެމް)ގެ ބޯޑު މެންބަރެއްގެ މަގާމު އަދާކުރެއްވި މަރިޔަމް ވަހީދާ އާއި ރާއްޖެޓީވީގެ ކުރީގެ ނިއުސް ޑިރެކްޓަރު އަލީ ޔޫސުފް އެ މަގާމަށް އައްޔަންކޮށްފައިވަނީ 5 ޑިސެންބަރު 2019 ވަނަ އަހަރެވެ. އެ ކޮމިޝަންގެ މެންބަރު ކަމުގެ ދައުރަކީ 5 އަހަރެވެ.
Ads by STO
