އޮންލައިން ޓްރޭޑިންގެ ސަބަބުން ރާއްޖެއިން ބޭރުވާ ޑޮލަރު އިތުރުވޭ: ބީއެމްއެލް
ޓްރޭޑްކޮށްގެން ލިބޭ ފައިދާ ޑޮލަރު އެކައުންޓަށް ޖަމާ ކޮށްދިނުން ބޭންކް އޮފް މޯލްޑިވްސް އިން ހުއްޓާލާފައި ވަނީ، އޮންލައިން ޓްރޭޑިންގެ ސަބަބުން ރާއްޖެއިން ބޭރުވާ ޑޮލަރު އިތުރުވާތީ ކަމަށް ބީއެމްއެލްގެ ސީއީއޯ އަދި މެނޭޖިން ޑިރެކްޓަރ ޓިމް ސޯޔާ ވިދާޅުވެއްޖެއެވެ.
ޓިމް މިހެން ވިދާޅުވެފައިވަނީ، އިއްޔެ ހަވީރު ބައެއް މީޑިއާ ތަކާއެކު ޒޫމް މެދުވެރިކޮށް ބޭއްވި ބައްދަލުވުމެއްގައި ވާހަކަ ދައްކަވަމުނެވެ.
"ވިސާ ޑައިރެކްޓް" 'މާސްޓަކާޑް ސެންޑް" ފަދަ ޕްލެޓްފޯމް މެދުވެރިކޮށް ލިބޭ ފައިސާ ޑޮލަރު އެކައުންޓްތަކަށް ޖަމާކޮށްދިނުން ބޭންކުން ހުއްޓާލައި އެ ފަދަ ފައިސާ ހަމައެކަނި ރުފިޔާ އެކައުންޓަށް ޖަމާކުރުމަށް ބީއެމްއެލްއިން މިދިޔަ މަހު ފަހުކޮޅުވަނީ ނިންމާފައެވެ. މިއާއެކު ގިނަ ބައެއްގެ ފާޑު ކިޔުން ބީއެމްއެލްއަށް ވަނީ އަމާޒު ވެފައެވެ.
ޓިމް ވިދާޅުވީ މިނިންމުން ނިންމާފައިވަނީ ގިނަ ގޮތްގޮތަށް ވިސްނުމަށްފަހުގައި ކަމަށާއި އޮންލައިން ޓްރޭޑިންގެ ސަބަބުން ރާއްޖެއިން ބޭރުވާ ޑޮލަރު އިތުރުވަމުން އަންނަ ކަމަށެވެ. އަދި މި ގޮތަށް އެތައް ހާސް ޑޮލަރެއް ބޭރަށް ދިޔުމުގެ ސަބަބުން ބީއެމްއެލްގައި ހުރި ޑޮލަރު މިންވަރު ދަށްވެ، ޓީޓީ ފަދަ މުހިންމު ބޭނުންތަކަށް ޑޮލަރު ދިނުމުގައި ދަތިތަކާ ކުރިމަތިވާ ކަމަށްވެސް ޓިމް ވިދާޅުވިއެވެ.
"މީގެ ތެރެއިން ގިނަ ފަރާތްތަކުން ޑެބިޓް އަދި ކްރެޑިޓް ކާޑު ބޭނުންކޮށްގެން ޓްރޭޑް ވޮލެޓްތަކަށް 15.42 ރުފިޔާގެ ރޭޓުގައި ޑޮލަރު ޓޮޕްއަޕްކޮށް އަދި ވިސާ ޑައިރެކްޓް ފަދަ ޕްލެޓްފޯމްތައް މެދުވެރިކޮށް ޑޮލަރު އެކައުންޓްތަކަށް ފައިސާ ގެނޭ. މި ގޮތަށް ޑޮލަރު ލިބުމާއެކު މިފަރާތްތަކުން އެކައުންޓްގައި ހުރި ޑޮލަރު އޭޓީއެމް މެދުވެރިކޮށް ނަގައި އެހެން މާކެޓްތަކަށް ޑޮލަރު ވިއްކާ. މި ގޮތަށް އަމަލުކުރުމުގެ ސަބަބުން ކާޑު އެސޯސިއޭޝަންތަކަށް ބޭންކުން ޑޮލަރުން ފައިސާ ދައްކާއިރު ކަސްޓަމަރުން ކާޑަށް ފައިސާ މިދައްކަނީ ރުފިޔާއިން ކަމަށްވާތީ މި ދެންނެވި ގޮތަށް އަމަލުކުރުމުގެ ސަބަބުން ބޭންކުން ބޭރަށް ދާ ޑޮލަރު މިވަނީ ވަރަށް ބޮޑުތަނުން އިތުރުވެފަ." ޓިމް ވިދާޅުވި އެވެ.
ކޮވިޑް19 އާ ގުޅިގެން ރާއްޖޭގެ މާކެޓްގައި ޑޮލަރުގެ އަގުވަނީ ވަރަށް ބޮޑަށް އުފުލިފައެވެ. މިގޮތުން ކަޅު ބާޒާރުގައި މިހާރު ޑޮލަރެއް ހުރީ ވިހި ރުފިޔާ އަށްވުރެ މަތީގައެވެ.
