15 ފުލުހަކު ޗައިނާއަށް
ޗައިނާގެ މިނިސްޓްރީ އޮފް ޕަބްލިކް ސެކިއުރިޓީން އިންތިޒާމުކޮށްގެން ހިންގާ "ސެމިނާ ފޯ އިންޓާމީޑިއެޓް އެންޑް ސީނިއާ ޕޮލިސް އޮފިސާސް" ގައި ބައިވެރިވުމަށް ދިވެހި ފުލުހުންގެ ހިދުމަތުގެ 15 އޮފިސަރުން ޗައިނާއަށް ފުރައިފި އެވެ.
ފުލުހުން ބުނީ، އެ ސެމިނާ ކުރިއަށް ގެންދިއުމަށް ހަމަޖެހިފައިވަނީ މިއަދުން ފެށިގެން މި މަހުގެ 14 ވަނަ ދުވަހުގެ ނިޔަލަށް ކަމަށެވެ. ސެމިނާ ބާއްވާނީ ޗައިނާގެ ހައިނަން ޕްރޮވިންސްގެ ހައިކޫގަ އެވެ.
އެ ސެމިނާގައި ބައިވެރިވާ އޮފިސަރުންގެ ތެރޭގައި ހިމެނެނީ ސުޕްރިންޓެންޑެންޓް އޮފް ޕޮލިސް ރަހްމާ ސައީދާއި ޗީފް އިންސްޕެކްޓާ އޮފް ޕޮލިސް މުހައްމަދު ދިމްހާމް އާއި ނަސްރުﷲ ޖަލީލުގެ އިތުރުން އިންސްޕެކްޓާ އޮފް ޕޮލިސް ރޭންކުގެ 12 ފުލުހުންނެވެ.
އިންޓާމީޑިއެޓް އެންޑް ސީނިއާ ޕޮލިސް އޮފިސާސް ސެމިނާގައި ބައިވެރިވާ އޮފިސަރުންނަށް މައްސަލަ ތަހުގީގު ކުރުމާއި ކެލިގްރަފީ އަދި ސްވޮޓް ޓެކްޓިކްސް އަދި ސެލްފް ޑިފެންސް އާ ގުޅޭ އަމަލީ ތަމްރީނުތައް ދެވޭނެ ކަމަށް ފުލުހުން ބުނެފައިވެ އެވެ.
މީގެ އިތުރުން ފުލުހުން ބުނީ، ޗައިނާގެ ރައީސް ޝީ ޖިންޕިންގެ ގާނޫނީ ވިސްނުންފުޅުތަކާއި ޗައިނާގެ ފުލުހުންގެ ސްޓްރެޓެޖީ، ފުލުހުންގެ ލީޑާޝިޕާއި ފްރޯޑް ހުއްޓުވުމާ ގުޅުންހުރި މައުލޫމާތު އެ ސެމިނާގައި ހިއްސާކުރާނެ ކަމަށެވެ. އަދި ކޮމިއުނިޓީ ޕޮލިސިން ނިޒާމު އަދި އާންމު ރައްޔިތުންގެ ސަލާމަތާއި ރައްކާތެރިކަމާ ގުޅޭ ދާއިރާތަކުން މައުލޫމާތާއި ތަޖުރިބާ ވެސް ހިއްސާކުރާނެ ކަމަށެވެ.
އެ ސެމިނާގައި ބައިވެރިވުމަކީ އެ ހިދުމަތުގެ އޮފިސަރުންނަށް ޗައިނާގެ ފުލުހުންގެ ތަޖުރިބާއިން އުނގެނި އަދި ދެ ގައުމުގެ ފުލުހުންނާ ގުޅުން އިތުރަށް ބަދަހިކުރުމަށް ލިބިގެންދާ މުހިންމު ފުރުސަތެއް ކަމަށް ފުލުހުން ދެކެ އެވެ.
