މަޖިލީހުގެ މިއަދުގެ ޖަލްސާ ކެންސަލްކޮށްފި
ރައްޔިތުން މަޖިލީހުގެ މިއަދުގެ ޖަލްސާ ކެންސަލް ކޮށްފި އެވެ.
މަޖިލީހުގެ ޖަލްސާތައް އާއްމުކޮށް ބާއްވަނީ، ހޯމަ، އަންގާރަ އަދި ބުދަ ދުވަހު އެވެ. އާއްމުކޮށް އެ ތިން ދުވަހުގެ ހެނދުނު 9 ޖަހާއިރު ޖަލްސާ ފަށާއިރު، މިއަދުގެ ޖަލްސާ އެގަޑީގައި ފަށާފައެއް ނުވެ އެވެ. އަދި އެޖެންޑާ ވެސް އާއްމުކޮށްފައެއް ނުވެ އެވެ.
ޖަލްސާ ކެންސަލް ކުރި ސަބަބު ހާމަކޮށްފައެއް ނުވެ އެވެ.
އިއްޔެ މަޖިލީހުގައި ކުރިއަށްދިޔައީ ސަރުކާރުގެ ފަރާތުން މާފަންނު ދެކުނު ދާއިރާގެ މެންބަރު އަބްދުﷲ ރިފާއު (ބޮޗޭ) ގާނޫނަށް ހުށަހެޅުއްވި އިސްލާހުގެ ބިލަށް ބަހުސް ކުރުމުގެ މަސައްކަތެވެ. އިއްޔެގެ ޖަލްސާ ނިންމާލީ އެ ބިލަށް ބަހުސް ކުރުމުގެ ފުރުސަތަކަށް އިތުރު މެމްބަރަކު އެދިފައި ނުވުމުން، އެޖެންޑާ އައިޓަމް މަޑުޖައްސާލައިފަ އެވެ.
އިއްޔެ މަޖިލީހުގެ ޖަލްސާ ނިންމާލަމުން އެވަގުތު ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވެސް މިއަދު ޖަލްސާއެއް އޮންނާނެކަން އިއުލާނުކުރެއްވި އެވެ.
މަޖިލީހުން ނިންމަންޖެހޭ މުހިންމު މަސައްކަތްތަކެއް ހުރުމުން، މި މަހުގެ 15 ވަނަ ދުވަހާއި ހިސާބަށް މަޖިލީހުގެ ދައުރު ވަނީ ދަންމާލައިފަ އެވެ.
މަޖިލީހުގެ ގަވާއިދު ބުނާ ގޮތުން މަޖިލީހުގެ ފުރަތަމަ ދައުރަކީ ފެބްރުއަރީ 1 އިން ފެށިގެން މޭ މަހުގެ 15 އަށެވެ. އަދި ދެވަނަ ދައުރަކީ ޖޫން 1 އިން ފެށިގެން އޮގަސްޓް 15 އަށެވެ.
އޭގެ އިތުރުން މަޖިލީހުގެ ތިންވަނަ ދައުރަކީ އޮކްޓޯބަރު 1 އިން ފެށިގެން ނޮވެބަރު ނިޔަލަށް ކަމަށް ވެސް އެ ގަވާއިދުގައި ބުނެ އެވެ.
