މި އަހަރު ތެރޭގައި 655 ކިލޯގެ ޑްރަގު އަތުލައިގަތް
މި ހިނގާ 2024 ވަނަ އަހަރުގެ ތެރޭގައި 655 ކިލޯގެ މަސްތުވާތަކެތި އަތުލައިގަނެފި އެވެ.
އެކަން ހިއްސާކުރެއްވީ އަރިއަތޮޅު އުތުރުބުރި އާއި މާލެ އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި، އއ ރަސްދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ޑރ މުހައްމަދު މުއިއްޒު އެވެ.
އެ ބައްދަލުވުމުގައި މަސްތުވާތަކެއްޗާ ދެކޮޅަށް މި ސަރުކާރުން ކޮށްފައިވާ މަސައްކަތުގެ ތަފާސް ހިސާބުތައް ހިއްސާކުރައްވަމުން ރައީސް ވިދާޅުވީ މަސްތުވާތަކެތީގެ ވިޔަފާރި ހިންގާ ތަންތަން ބަލައިފާސްކުރުމުގެ އޮޕަރޭޝަން ވަރަށް ބޮޑަށް ފުޅާކޮށްފައިވާ ކަމަށެވެ.
އެގޮތުން މި އަހަރު ތެރޭގައި މަސްތުވާތަކެތީގެ ވިޔަފާރި ކުރަމުންދާ 13،430 ތަނެއް ބަލައި ފާސްކޮށްފައިވާ ކަމަށް ރައީސް ވިދާޅުވި އެވެ. އަދި 2022 ވަނަ އަހަރު 8،581 ތަނެއް ބަލައި ފާސްކޮށްފައިވާ ކަމަށް ވިދާޅުވި އެވެ.
"މި އަހަރު 655 ކިލޯގެ ޑްރަގު ކޮންފިސްޓިކޭޓް ކޮށްފިން. އެތަކެތި ނައްތާލައިފިން، ނައްތާލަނީ ވެސް ނޫސްވެރިންގެ ކުރިމަތީގައި، މިދިޔަ އަހަރު 2023 ގެ ނޮވެމްބަރާ ހަމަޔަށް ކޮންފިސްޓިކޭޓް ކޮށްފައިވަނީ އެންމެ 113 ކިލޯ،" މިއަހަރު އަތުލައިގަތް މަސްތުވާތަކެއްޗަކީ މިދިޔަ އަހަރާއި އަޅައިބަލާއިރު ހަ ގުނަ އިތުރު އަދަދެއް ކަމަށް ރައީސް ވިދާޅުވި އެވެ.
"މި އަހަރު ތެރޭގައި އަޅުގަނޑުމެން ކޮންފިސްޓިކޭޓެޑް ކުރި ޑްރަގުގެ އަދަދަކީ 1.3 ބިލިއަން ރުފިޔާ" ރައީސް ވިދާޅުވީ މިދިޔަ އަހަރުގެ ނޮވެމްބަރުގެ ނިޔަލަށް އަތުލައިގަތް ޑްރަގުގެ އަގު އުޅެނީ 256 މިލިއަން ކަމަށެވެ.
މަސްތުވާތަކެތީގެ މައްސަލައަށް ހައްލު ހޯދުމަށް ކުރަމުން އަންނަ މަސައްކަތުގެ ތެރެއިން މަސްތުވާތަކެއްޗާ ބެހޭ ގާނޫނު އިސްލާހުކުރާ ބިލު ސަރުކާރުގެ ފަރާތުން ރައްޔިތުންގެ މަޖިލިހަށް މިދިޔަ ހަފުތާގައި ވަނީ ހުށަހަޅާފަ އެވެ.
ބިލުގައި ގާނޫނުގެ ދަށުން ކޮންޓްރޯލްކޮށްފައިވާ މަސްތުވާއެއްޗެހީގެ އިތުރުން އަލަށް ކޮންޓްރޯލް ކުރަން ޖެހޭ މަސްތުވާތަކެތި ކޮންޓްރޯލް ކުރެވޭނެ ނިޒާމެއް ތައާރަފު ކުރުމާއި މަސްތުވާތަކެއްޗާ ގުޅޭ އިތުރު ކުށާއި އަދަބު ކަނޑައަޅަން ހިމަނާފައިވެ އެވެ.
އަދި މަސްތުވާތަކެއްޗާ ގުޅޭ ކުށްތައް ހުއްޓުވުމަށް ގާނޫނު ތަންފީޒުކުރާ އިދާރާތަކަށް އިތުރު ބާރުތައް ލިބިދިނުމާއި ކުށް ކޮށްގެން ހޯދާ މުދާ ހިފެހެއްޓުމާއި އެފަދަ މުދާ ދައުލަތަށް ނެގުމުގެ އުސޫލު މުރާޖާކުރަން ވެސް ވަނީ ހިމަނާފަ އެވެ.
