ތޫނު ހަތިޔާރު ބޭނުންކޮށްގެން މާލޭގައި މާރާމާރީތަކެއް
ތޫނު ހަތިޔާރު ބޭނުންކޮށްގެން މާލޭ ސިޓީގައި ހިންގި މާރާމާރީތަކެއް މައްސަލަ ފުލުހުން ބަލަން ފަށައިފި އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ ބަލަމުން ދަނީ މިދިޔަ ބުރާސްފަތި ދުވަހު ރިޕޯޓުކުރި އެއް މައްސަލަ އާއި ރޭ މާރާމާރީ ހިންގި 3 މައްސަލައެއް ކަމަށެވެ.
މިދިޔަ ބުރާސްފަތި ދުވަހު އެ އިދާރާއަށް ހުށަހަޅާފައި ވަނީ ލެޓްސްގޯ ކެފޭއަށް ބަޔަކު ވަދެ ގެއްލުންދިން މައްސަލައެކެވެ.
ރޭ ހުށަހެޅި އެއް މައްސަލައަކީ ސައިކަލެއްގައި ހެލްމެޓް އަޅައިގެން އައި ބަޔަކު، މުނިޔާމަގު ދި ރިޕަބްލިކް ކެފޭ ތެރެއަށް ވަދެ މާރާމާރީ ހިންގި މައްސަލަ ކަމަށް ފުލުހުން ބުންޏެވެ.
އަދި 6 މީހަކު ސައިކަލުތަކުގައި އައިސް, ޝަހީދުކުޑަނެވި ތުއްތުމަނިކު ހިނގުން، ކިންޒާ ކެފޭ ކުރިމަތީ ތޫނު ހަތިޔާރު ބޭނުންކޮށްގެން ރޭ މާރާމާރީ ހިންގާފައިވާ މައްސަލައެއް ރިޕޯޓުކޮށްފައިވާ ކަމަށެވެ.
ފުލުހުން އިތުރަށް ބުނި ގޮތުގައި ފިލިގަސްމަގު ނޫރު މިސްކިތް ކައިރީގައި ބަޔަކު މީހުން މާރާމާރީ ހިންގި މައްސަލައެއް ވެސް ރޭ އެ އިދާރާއަށް ހުށަހަޅާފައިވާ ކަމުގަ އެވެ.
މި މައްސަލަތައް ތަހުގީގު ކުރަމުންދާއިރު، ތަހުގީގު ކުރިއަށްދާ މިންވަރަކުން އިތުރު ތަފްސީލު ހާމަކުރަމުން ގެންދާނެ ކަމަށް ފުލުހުންގެ މެސެޖުގައިވެ އެވެ.
