ގައިރު ދީންތަކުގެ ގޮތްތައް ކޮޕީކުރުމުން އިސްލާމްދީނުގެ އަމިއްލަވަންތަކަން ގެއްލޭ: ހުތުބާ
އަޅުކަމުގެ ގޮތުން ކުރެވޭ ކަންކަމުގައި އެހެން ބަޔަކު ކޮޕީ ކުރުމަކީ އިސްލާމީ އުންމަތުގެ ޝަހުސިއްޔަތު ފުނޑުފުނޑުވެ، ދީނުގެ އަމިއްލަވަންތަކަން ގެއްލޭނެ ކަމެއް ކަމަށް މިއަދުގެ ހުކުރު ހުތުބާގައި ބުނެފި އެވެ.
ގައިރުދީންތަކުގެ ޝިއާރުތައް ފާޅުކުރުމުގެ މައްޗަށް އަލިއަޅުވާލައި ހުތުބާގައި ބުނީ ޝައީރާއަކީ ދީނުގެ ކަންތައްތަކުގެ ތެރެއިން އެ ކަންތަކުގައި ހިފަހައްޓަން މާތް الله އަމުރުކުރައްވާފައިވާ އެންމެހާ ކަންތައްތައް ކަމަށެވެ. މާތް الله ގެ ޝައީރާތަކަށް މާތްކޮށް ހިތުމަކީ މި ޝައީރާތަކަށް އަހަރެމެންގެ ހިތްތަކުގައި މަތިވެރި މަގާމު ދިނުން ކަމަށެވެ.
އިސްލާމްދީނުގެ ޝައީރާތަކުގެ ތެރޭގައި ވަކި މޫސުމަކާ ގުޅިފައިވާ ޝައީރާތައްވާ ކަމަށެވެ. ސޯލިހު ކޮންމެ އަމަލަކީ الله ގެ ޝައީރާއެއް ކަމަށާއި އެކަލާނގެ ޝައީރާތައް މާތްކުރައްވާފައިވާތީ އަހަރެމެން ވެސް އެ ޝައީރާތައް މަތިވެރިކުރަން ޖެހޭނެ ކަމަށެވެ.
އެގޮތުން އިސްލާމްވަންތަކަމާއި ދީނީ ޝަހުސިއްޔަތު ދެމެހެއްޓުމަކީ، އިސްލާމީ ޝައީރާގެ ތެރޭގައި ހިމެނޭ ކަމެެއް ކަމަށެވެ. ހުރިހާ ދަންނަބޭކަލުން އެއްބަސްވެވަޑައިގަންނަވާ ގޮތުގައި މުސްލިމުން އެއްވެސް ކަމެއްގައި ގައިރު ދީންތަކުގެ މީހުންނާ އެއްގޮތަށް އުޅެގެންނެއް ނުވާނެ ކަމަށެވެ. އެމީހުންގެ ހާއްސަ އާދަކާދަތަކުގެ ތެރެއިން ކަމެއް ނުވަތަ އެހެން ދީންތަކުގެ އީދުތައް ފާހަގަކުރުމުގައި ބައިވެރިވުން ފަދަ ކަމެއް ކަމުގައި ވިނަމަވެސް، އަހަރެމެން އެމީހުން ކޮޕީކޮށް، ނަކަލުކޮށް، އެއްގޮތްވުމަކީ ހުއްދަވެގެންވާ ކަމެއް ނޫން ކަމަށް ހުތުބާގައި ބުންޏެވެ.
މިއަދުގެ ހުތުބާގައި ބުނި ގޮތުގައި އަޅުކަމުގެ ގޮތުން ކުރެވޭ ކަންކަމުގައި އެހެން ބަޔަކު ކޮޕީކުރުމަކީ ނުވަތަ އެހެން ބަޔަކާ އެއްގޮތަށް އަމަލުކުރުމަކީ އިސްލާމީ އުންމަތުގެ ޝަހުސިއްޔަތު ފުނޑުފުނޑުވެ، ދީނުގެ އަމިއްލަވަންތަކަން ގެއްލޭނެ ކަމެއް ކަމުގަ އެވެ.
އިލްމުވެރީން ވިދާޅުވާ ގޮތުން މުސްލިމުން ގައިރުމުސްލިމުންގެ ދީނީ ޝިއާރުތަކަށް ތަބާވުމަކީ ކަނޑައެޅިގެން ހަރާމް ކަމެެއް ކަމުގަ އެވެ. އޭގެ ތެރޭގައި އެމީހުންގެ އީދުތައް ފާހަގަކުރުމާއި އެކަމުގައި ބައިވެރިވެ، ތަހުނިޔާ ކިޔުން ހިމެނޭ ކަމުގަ އެވެ.
މުސްލިމުން ކްރިސްމަސް ފާހަގަކުރުމާއި މި އިހުތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއް ނޫން ކަމުގަ އެވެ. ކްރިސްމަސްގަހާއި ސެންޓަ ކްލޯސް ފަދަ ނަސޯރާއިން އެމީހުންގެ ދީނަށް ނިސްބަތްކޮށް، ކުރާ ކަންތައްތައް މި އީދުގެ ތެރޭގައި ހިމެނޭއިރު، މިފަދަ އަމަލުތަކުން ރާއްޖޭގެ މުޖުތަމައުތައް ސަލާމަތްވާން ޖެހޭނެ ކަމުގަ އެވެ.
ދީނާ ހިލާފު ފިކުރުތަކުގެ އަހުލުވެރިން މުސްލިމުންގެ ހިތްތަކަށް ވެރިވެގަތުމަށް ތަފާތު ދަޅަތަކާއި މަޅިތައް ޖަހައިގެން މުސްލިމުން އެމީހުންގެ އަގީދާ އާއި ދީން މަނާކުރާ ކަންތައްތަކުގެ ތެރެއަށް ވައްޓާލުމަށް މަސައްކަތް ކުރާ ކަމުގަ އެވެ. އެމީހުންނަށް ތަބާވަންދެން އެމީހުން މި މަސައްކަތް ހުއްޓާނުލާނެކަން މާތް ﷲ ވަނީ އަންގަވާފައި ކަމުގަ އެވެ.
ހުކުރު ހުތުބާގައި ބުނީ ހެޔޮލަފާ އިސްލާމީ މުޖުތަމައެއް ބިނާކުރެވޭނީ އިސްލާމީ ސަގާފަތް ފަތުރައިގެން ކަމަށެވެ. އިސްލާމީ އަގީދާ އާއި އަހުލާގުގެ މަތީގައި އާއިލާ ބިނާކުރެވިގެން ކަމަށެވެ. އިސްލާމީ މުޖުތަމައުގެ ބިންގަލަކީ އަގީދާ ކަމަށެވެ. ގައިރު މުސްލިމުންގެ އީދުތަކާއި އެމީހުންގެ އަގީދާ އާ ގުޅިފައިވާ ކަންކަމުގައި ބައިވެރިވުން ހަރާމްވުމަކީ، އެމީހުންނާ މެދު އިހުސާންތެރިވެ އަދުލުވެރި ނުވާންވީ ސަބަބެއް ނޫން ކަމަށެވެ.
ދީނާއި އަގީދާ އާ ގުޅުންހުރި ކަންކަމަކީ ވަކި މައްސަލައެއްކަން ފާހަގަކޮށް ހުތުބާގައި ބުނި ގޮތުގައި މުސްލިމުންނާއި ގައިރު މުސްލިމުންގެ ގުޅުމުގެ އަސްލަކީ އަނިޔާވެރިނުވާހާ ހިނދެއްގައި، ސުލްހަވެރިކަމާއި އަދުލުވެރިކަން ބޭއްވުން ކަމުގަ އެވެ. ގައިރު މުސްލިމުންނަށް ހެޔޮކޮށް ހިތައި އިހުސާންތެރިވެ، އަދުލުވެރިވުމަކީ މުސްލިމުންނަށް މާތް ﷲ އަމުރުކުރައްވާފައިވާ ކަމެއްކަން ވެސް މިއަދުގެ ހުތުބާގައި ވަނީ ފާހަގަކޮށްފަ އެވެ.
