ސްޓެލްކޯއިން އިންދި ގަހުގެ އަދަދު 50,000 އިން މަތީގައި
ބައިނަލްއަގުވާމީ ތިމާވެށީގެ ދުވަހާއި ގުޅުވައިގެން، ރައީސް ޑރ މުހައްމަދު މުއިއްޒު އިފްތިތާހު ކުރެއްވި ފަސްމިލިއަން ގަސް ޕްރޮގްރާމްގެ ދަށުން ސްޓެލްކޯއިން 50,000 އަށް ވުރެ ގިނަ ގަސް އިންދައިފި އެވެ.
ފަސް މިލިއަން ގަސް އިންދުމުގެ ޕްރޮގްރާމްގެ ދަށުން ސްޓެލްކޯއިން ގަސް އިންދުމުގެ ޕްރޮގްރާމް މިދިޔަ ޖޫން މަހުގެ ފަސް ވަނަ ދުވަހު ފެށީ ކ ތުލުސްދޫއިން އެވެ.
ސްޓެލްކޯއިން މިއަދު ބުނީ އެ ޕްރޮގްރާމްގެ ދަށުން އިއްޔެއާ ހަމައަށް އެ ކުންފުނިން ހިދުމަތްދޭ ރަށްރަށުގައި ޖުމްލަ 52،334 ގަސް އިންދާފައިވާ ކަމަށެވެ.
ސްޓެލްކޯއިން އަމާޒު ހިފާފައިވަނީ ފަސް އަހަރުގެ ތެރޭގައި 500،000 ގަސް އިންދުމަށެވެ.
ސްޓެލްކޯގެ އެމްޑީ ހުސެއިން ފަހުމީ ވަނީ ގަސް އިންދުމުގެ ހަރަކާތުގައި އުޅޭ ސްޓެލްކޯގެ ސްޓާފުންނަށް ވަރަށް ބޮޑަށް ތައުރީފް ކުރައްވައިފަ އެވެ.
ފަހުމީ ވިދާޅުވީ އެވްރެޖްކޮށް ކޮންމެ މަހަކު 8340 ގަސް އިންދެމުންދާ ކަމަށާއި އެއާއެކު ޓާގެޓު ހާސިލުވާނެ ކަމަށެވެ.
ފަސް މިލިއަން ގަސް ޕްރޮގްރާމަކީ ރައީސް މުއިއްޒުގެ ތަސައްވުރަކަަށް ވާތީ ފަހުމީ ވަނީ ރައީސަށް ޝުކުރުވެސް އަދާކުރައްވައިފަ އެވެ.
ފަހުމީ ވިދާޅުވީ މިއީ ރައީސް ވަރަށް ވިސްނުންތެރިކަމާއެކު މިހާރާއި އަދި މުސްތަގުބަލުގެ މަންފާއަށް އެެޅުއްވި މުހިންމު ފިޔަވަޅެއް ކަމަށެވެ.
އަދި ބައިބައިވުންތަކާއެކު ގައުމުގެ ތަރައްގީއަށް ހުރަސް އެޅުމުގެ ބަދަލުގައި އެންމެ ގުޅިގެން ގައުމު ކުރިއަރުން މަސައްކަތް ކުރަން ފަހުމީ ގޮވާލެއްވި އެވެ.
Ads by STO
