އިންޑިއާގެ ވައިގެ ދަތުރުތައް އިތުރުކުރުމަށް 70.6 ބިލިއަން ޑޮލަރު އިންވެސްޓްކުރަން ނިންމައިފި
އިންޑިއާގެ ވައިގެ ދަތުރުތައް އިތުރުކުރުމަށްޓަކައި 2027 ވަނަ އަހަރުގެ ނިޔަލަށް 70.6 ބިލިއަން އެމެރިކާ ޑޮލަރު އިންވެސްޓްކުރަން ނިންމައިފި އެވެ.
އިންޑިއާގެ މަދަނީ ވައިގެ ދަތުރުފަތުރުގެ ވަޒީރު ޖިއޯތިރާދިތިއާ ސިންދިއާ ބުނީ މި އިންވެސްޓްމަންޓްގެ މަގްސަދަކީ އިންޑިއާގެ ވައިގެ ދަތުރުތަކުގައި އަހަރަކު 460 މިލިއަން ފަސިންޖަރުންނަށް ހިދުމަތް ދެވޭ މިންވަރަށް އިތުރުކުރުން ކަމަށެވެ.
ވަޒީރު ވިދާޅުވީ މި އިންވެސްޓްމަންޓްގެ ތެރެއިން 17 ބިލިއަން ޑޮލަރު ހަރަދުކުރާނީ އައު ރަންވޭއެއް އެޅުމަށާއި މިހާރު ހުރި ރަންވޭ ތަރައްގީކުރުމަށް ކަމަށެވެ. އަދި 9 ބިލިއަން ޑޮލަރު ހަރަދުކުރާނީ އެއާ ޓްރެފިކް މެނޭޖްމަންޓް ސިސްޓަމްތައް ތަރައްގީކުރަން ކަމަށްވެސް ވަޒީރު ވިދާޅުވި އެވެ.
މީގެ އިތުރުން އިންޑިއާގެ ސަރުކާރުން ވަނީ ކުރިއަށް އޮތް ތިން އަހަރުގެ ތެރޭގައި 80 އައު ވައިގެ ބަނދަރު އެޅުމަށް ރާވަފަ އެވެ. މިއީ އިންޑިއާގެ ވައިގެ ދަތުރުފަތުރުގެ ދާއިރާ ފުޅާކޮށް، އިގްތިސޯދީ ކުރިއެރުން ހޯދުމަށް ކުރެވޭ މުހިންމު އިންވެސްޓްމަންޓެއް ކަމަށްވެސް ދަތުރުފަތުރުގެ ވަޒީރު ޖިއޯތިރާދިތިއާ ސިންދިއާ ފާހަގަކުރެ އެވެ.
މިހާރު އިންޑިއާގެ ވައިގެ ބަނދަރުތަކުން އަހަރަކު 350 މިލިއަން ފަސިންޖަރުންނަށް ހިދުމަތް ދެއެވެ.
