އިނގިރޭސިވިލާތުގެ ޤާނޫނު ހަދާ މަޖިލީހުގެ ރައީސާއި ނަޝީދު ބައްދަލުކުރައްވައިފި
އިނގިރޭސިވިލާތުގެ ޤާނޫނު ހަދާ މަޖިލީހުގެ ރައީސް ސަރ ލިންޑްސޭ ހޮއީލް އާއި، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ބައްދަލު ކުރައްވައިފިއެވެ.
މިބައްދަލުކުރެއްވުމާއި ގުޅޭގޮތުން ރައްޔިތުންގެ މަޖިލީހުގެ އިދާރާއިން ބުނެފައިވަނީ، ރައީސް ނަޝީދާއި ސަރ ލިންޑްސޭ މަޝްވަރާ ކުރެއްވީ ދެ ޤަައުމުގެ ޤާނޫނު ހަދާ މަޖިލިހާއި ބެހޭ ގޮތުންނާއި، ދެ ޤައުުމުގެ ދެމެދުގައި އޮތް ގާތް ގުޅުމާއި ބެހޭގޮތުން ކަމަށެވެ.
ރައީސް ނަޝީދުގެ ޢާއިލާގެ ބައެއް ބޭފުޅުން އިނގިރޭސިވިލާތުގައި ދިރިއުޅުއްވާތީ، މިދަތުރުފުޅަކީ މިދިޔަ މަހު ފަހުކޮޅު ރައީސް ނަޝީދު އެޤައުމަށް ކުރެއްވި ނުރަސްމީ ދަތުރުފުޅެކެވެ.
މަޖިލިސް ރައީސް އިނގިރޭސިވިލާތުގައި ހުންނެވިއިރު، ދެވަނަ ދައުރުގެ މަސައްކަތް ނިމި ރައްޔިތުންގެ މަޖިލިސް ވެސް އޮތީ އެއް މަސް ދުވަހުގެ ޗުއްޓީ އެއްގައެވެ.
މަޖިލީހުގެ ގަވާއިދު ބުނާ ގޮތުން އަހަރުގެ ފުރަތަމަ ދައުރު ކުރިއަށް ދާނީ ފެބްރުއަރީ މަހުން ފެށިގެން އޭޕްރީލް މަހުގެ ނިޔަލަށެވެ. ދެވަނަ ދައުރު ހިނގާނީ ޖޫން މަހުގެ ފުރަތަމަ ދުވަހުން ފެށިގެން އޮގަސްޓް މަހުގެ ނިޔަލަށެވެ. ތިންވަނަ ދައުރު ހިނގާނީ އޮކްޓޯބަރު މަހުގެ ފުރަތަމަ ދުވަހުން ފެށިގެން ނޮވެމްބަރުގެ ނިޔަލަށެވެ.
