"ދޭވްދާސް" ގެ ސެޓަށް ޚަރަދުވީވަރު އެނގޭތަ؟
ބޮލީވުޑްގެ ކާމިޔާބު ޕްރޮޑިއުސަރ އަދި ޑިރެކްޓަރ ސަންޖޭ ލީލާ ބަންސާލީ އަބަދުވެސް ފާހަގަ ވެފައި ވަނީ، ތަފާތު ފިލްމުތަށް ހެދުމުގެ އިތުރުން އެފިލްމުތަކަށް އަމިއްލަ ސެޓު ނުވަތަ އެފިލްމުތަށް ކުޅެން ބޭނުންވާ ތަންތަން އަމިއްލަ ޚަރަދުގައި ހަދާ މީހެއްގެ ގޮތުގައެވެ.
އެހެން ޕްރޮޑިއުސަރުން "ފިލްމުސިޓީ" ގެ ސެޓުތަކާއި ބޭރުގެ ލޮކޭޝަންތަށް ބޭނުން ކުރާއިރު، ބަންސާލީ އޭނަގެ އަމިއްލަ ސެޓުތަށް މަރާމާތުކޮށް އޭނާ ބޭނުންވާ ގޮތަށް ތައްޔާރު ކުރެއެވެ.
ބަންސާލީ އުފެއްދި ފިލްމުތަކުން "ދޭވްދާސް" ވަކިން ބޮޑަށް ފާހަގަ ކޮށްލެވެއެވެ. ބަލާލަން ވެސް ވަރަށް ރީތި މިފިލްމުގެ ސެޓު އޭނާ ބޭނުން ގޮތަށް ތައްޔާރު ކުރަން ބަންސާލީގެ އަތުން ވަރަށް ބޮޑު ޚަރަދެއް ދިޔަ ކަމަށް ވެއެވެ.
އިންޑިއާގެ މީޑިއާތަކަށް ބަންސާލީ މައުލޫމާތު ދީފައިވާ ގޮތުގަައި މުޅި އެފިލްމުގެ ހުރިހާ ޚަރަދަކަށް އޭނާ އަތުން 50 ކްރޯޑަށްވުރެ ގިނަ ރުޕީސް ހޭދަވިއެވެ. އަދި ފިލްމުގައި ބޭނުން ކޮށްފައިވާ ހަ ސެޓު އުފެއްދުމަށް 20 ކްރޯޑް ރުޕީސް ޚަރަދު ކޮށްފަައިވެއެވެ. މިއީ އެދުވަސްކޮޅު އުފެއްދި ފިލްމުތަކާއި އަޅާބަލާއިރު އެންމެ އަގުބޮޑުކޮށް އުފައްދާފައިވާ ފިލްމުވެސް މެއެވެ.
"ދޭވްދާސް" ފިލްމުގެ ލީޑް ރޯލުން ފެނިފައިވަނީ އައިޝްވާރްޔާ ރާއީ ބަޗަން، ޝާހްރުކް ޚާން އަދި މާދުރީ ދިކްސިޓް އެވެ. މިފިލްމަކީ އެއަހަރު ނިކުތް އެންމެ ކާމިޔާބު ފިލްމެވެ. އަދި މިފިލްމަށް ގިނަ އެވޯޑުތަކެއް ވެސް ލިބިފައިވެއެވެ.
