މާލޭގައި ރޭގަނޑު އިމާރާތްކުރުން ވެސް މަނާކޮށްފި
ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން އަންނަ ބުރާސްފަތި ދުވަހުން ފެށިގެން މާލެ ސަރަހައްދުގައި ރޭގަނޑު އިމާރާތް ކުރުމާއި ވިޔަފާރި ކުރުން ވަކި ގަޑިތަކަކަށް މަނާ ކުރުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނިންމައިފި އެވެ.
އެޗްޕީއޭ އިން ބުނީ، މާލޭ ސިޓީގައި ހިންގަމުންދާ އިމާރާތްކުރުމުގެ މަސައްކަތްތައް ކޮންމެ ދުވަހަކު ވެސް ހަވީރު 5:00 އިން ހެނދުނު 6:00 އަށް މެދުކަނޑާލަން ޖެހޭނެ ކަމަށެވެ.
މިގޮތަށް އަމަލުކުރަން ޖެހޭނީ މާދަމާ މެންދުރު 12:00 ގެ ފެށިގެން ކަމަށް ވެސް އެޗްޕީއޭއިން ބުނެއެވެ.
އިމާރާތްކުރުމުގެ މަސައްކަތް ރޭގަނޑު މެެދުކަނޑާލަން އަންގާފައި މިވަނީ މިދިޔަ މަހުގެ 12 ގައި އިއުލާންކުރި އާންމު ސިއްހަތުގެ ކުއްލި ނުރައްކަލުގެ ހާލަތުގެ ދަށުން ޑިރެކްޓާ ޖެނެރަލް އޮފް ޕަބްލިކް ހެލްތަށް ލިބިފައިވާ ބާރުގެ ދަށުންނެވެ.
މާދަމާއިން ފެށިގެން ވަކި ވަގުތެއްގައި މާލޭގެ މަގުތަކަށް ނިކުމެ އުޅުން ވެސްް ވަނީ މަނާކޮށްފައެވެ. އަދި މާލޭގައި ހިންގާ ފިހާރަތައް ވެސް ރޭގަނޑު 11:00 އިން ފެށިގެން ހެނދުނު 6:00 އަށް ބަންދު ކުރަން ވަނީ އަންގާފައެވެ.
Ads by STO
