ޗައިނާގެ އިގްތިސޯދު އިތުރުކުރުމަށް ބީޖިންގް އިން މަސައްކަތްތަކެއް ކުރަނީ

ޗައިނާގެ އިގްތިސޯދާއި ސިޔާސީ ނުފޫޒު އިތުރުކުރުމަށް ބީޖިންގް އިން މަސައްކަތްތަކެއް ކުރާކަމަށް ބައިނަލްއަގްވާމީ ސަލާމަތީ މާހިރުން ބުނެފި އެވެ.

ގްރީކް ސިޓީ ޓައިމްސް އިން ރިޕޯޓުގައި ބުނީ ޗައިނާއިން މި ސަރަހައްދުގައި ހިންގަމުންދާ ބަނދަރުތަކާއި މަޝްރޫއުތަކަކީ ހަމައެކަނި އިގްތިސޯދީ ބޭނުންތަކަށް ނޫންކަމަށާއި، އޭގެ ފަހަތުގައި ސްޓްރެޓެޖިކް އަދި ސިޔާސީ މަގްސަދުތައް އޮތްކަމަށް ބެލެވޭ ކަމަށެވެ. ހާއްސަކޮށް ސްރީލަންކާގެ ހަންބަންޓޯޓާ ބަނދަރާއި ޕާކިސްތާނުގެ ގްވާދަރު ބަނދަރު ފަދަ ތަންތަނަކީ ޗައިނާގެ ކަނޑުގެ ބާރު އިތުރުކުރުމަށް ބޭނުންކުރެވިދާނެ ތަންތަން ކަމަށް ބެލެވެ އެވެ.

މީގެ އިތުރުން ރިޕޯޓުގައި ބުނީ އިންޑިއާ ކަނޑު ސަރަހައްދުގައި ހިމެނޭ ކުދި ޖަޒީރާ ގައުމުތަކަށް ޗައިނާއިން ދެމުންދާ ލޯނުތަކާއި އެހީތަކަކީވެސް މި ގައުމުތަކުގެ މައްޗަށް ނުފޫޒު ފޯރުވުމަށް ބޭނުންކުރެވޭ ވަސީލަތްތަކެއް ކަމަށެވެ. މިކަމުގެ ސަބަބުން މި ސަރަހައްދުގެ ސަލާމަތާއި ރައްކާތެރިކަމަށް ނުރައްކާވެދާނެކަމުގެ ބިރު ފުޅާވެގެންދާކަމަށްވެސް ރިޕޯޓުގައި ފާހަގަކޮށްފައިވެ އެވެ.

އިންޑިއާ ކަނޑު ސަރަހައްދުގައި ޗައިނާގެ ނުފޫޒު އިތުރުވަމުން ދިއުމާ ގުޅިގެން، އެމެރިކާ އާއި އިންޑިއާ ފަދަ ގައުމުތަކުން މިކަމާ ކަންބޮޑުވުން ފާޅުކޮށް، މި ސަރަހައްދުގެ ސަލާމަތާއި މިނިވަންކަން ދެމެހެއްޓުމަށް މަސައްކަތްކުރަމުންދާކަންވެސް ރިޕޯޓުތަކުގައި ފާހަގަކޮށްފައިވެ އެވެ.