ރައީސް ނަޝީދު ކޯވިޑް 19 އަށް ޓެސްޓް ކޮށްފި
މިހާރު ހަލުވިކަމާއިއެކު ދުނިޔޭގެ އެކި ހިސާބުތަކުގައި ފެތުރެމުންއަންނަ ކޯވިޑް 19 ވައިރަހަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ޓެސްޓް ކުރައްވައިފިއެވެ.
ރައީސް ނަޝީދު، ކޮވިޑް-19 އަށް ޓެސްޓްކޮށްފައިވަނީ އެމަނިކުފާނު އިނގިރޭސިވިލާތަށް ދަތުރު ކުރައްވާފައިވާތީއެވެ.
މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އޭރު އެމަނިކުފާނު ބައްޔަށް ޓެސްޓް ކޮށްފައި ނުވަނީ އެ ބަލީގެ އެއްވެސް އަލާމާތެއް ފެންނަން ނެތުމުން ކަމަށާއި މިއަދާ ހަމައަށް ވެސް ހުމާއި ރޯގާ ފަދަ ބައްޔެއްގެ އެއްވެސް އަލާމާތެއް ނެތް ކަމަށެވެ.
އެޗްޕީއޭއިން ނިންމާފައިވަނީ މާޗް މަހުގެ 14 ވަނަ ދުވަހުން 19 ވަނަ ދުވަހަށް އިނގިރޭސިވިލާތުން ރާއްޖެ އައި މީހުން ވެސް ޓެސްޓް ކުރުމަށެވެ.
ރާއްޖޭގައި މިހާތަނަށް ވަނީ 4 ދިވެއްސެއްގެ ގައިން ކޯވިޑް 19 ވައިރަސް ފެނިފައެވެ. އެ ހުރިހާ އެންމެންނަކީވެސް ޔޫކޭއަށް ދަތުރުކޮށްފައި އެނބުރި ރާއްޖެ އައި މީހުންނެވެ.
Ads by STO
