އިންޑިއާގެ އިލެކްޓްރޯނިކްސް އުފެއްދުންތެރިކަމަށް 4 ގުނައިގެ އިތުރުވުމެއް
އިންޑިއާގެ އިލްކެޓްރޯނިކްސް އުފެއްދުންތެރިކަމުގެ ދާއިރާއަށް 4.5 ގުނައަށްވުރެ ބޮޑު ކުރިއެރުމެއް ލިބިފައިވާ ކަމަށް ރިޕޯޓުތަކުން ދައްކައިފި އެވެ.
ރިޕޯޓުތަކުން ދައްކާގޮތުގައި އިންޑިއާ އިލެކްޓްރޯނިކްސް އުފެއްދުންތެރިކަމުގެ ދާއިރާގައި އަވަސް ދުވެލީގައި ކުރިއަރަމުންދެ އެވެ.
ސްމާޓްފޯނުން ފެށިގެން ލެޕްޓޮޕް ހަމައަށް، އިންޑިއާގެ އިލެކްޓްރޯނިކްސް އުފެއްދުންތެރިކަން އިތުރުވަމުންދާކަމަށް ރިޕޯޓުތަކުން ދައްކަ އެވެ.
އިންޑިއާގެ އިލެކްޓްރޯނިކްސް އަދި އިންފޮމޭޝަން ޓެކްނޮލޮޖީ މިނިސްޓްރީގެ ތަފާސްހިސާބުތަކުން ދައްކާގޮތުގައި، 2014 ވަނަ އަހަރުން ފެށިގެން 2023 ވަނަ އަހަރަށް އިލެކްޓްރޯނިކްސް އުފެއްދުންތެރިކަން 23 ބިލިއަން ޑޮލަރުން 105 ބިލިއަން ޑޮލަރަށް އަރާފައިވާކަމަށް ދައްކަ އެވެ.
އިންޑިއާގެ ސަރުކާރުން ތައާރަފުކޮށްފައިވާ "މޭކް އިން އިންޑިއާ" އަދި "ޕްރޮޑަކްޝަން ލިންކްޑް އިންސެންޓިވް" (ޕީއެލްއައި) ސްކީމްތަކުގެ ސަބަބުން މި ދާއިރާއަށް ބޮޑެތި ކުރިއެރުންތަކެއް ލިބެމުންދާކަމަށްވެސް ތަފާސް ހިސާބުތަކުން ދައްކަ އެވެ.
މި ސްކީމްތަކުގެ ދަށުން އިލެކްޓްރޯނިކްސް އުފެއްދުންތެރިކަމަށް ހާއްސަ އިނާޔަތްތަކާއި ލުއިތައް ދެމުން ގެންދެ އެވެ. އަދި އެޕަލް، ސެމްސަންގް އަދި ގޫގުލް ފަދަ ބޮޑެތި ޓެކްނޮލޮޖީ ކުންފުނިތަކުން އިންޑިއާގައި އުފެއްދުންތެރިކަން އިތުރުކުރަމުންދާކަން ވެސް ފާހަގަކުރެވެ އެވެ.
މީގެ އިތުރުން، އިންޑިއާގެ އަމިއްލަ ބްރޭންޑްތައް ކަމަށްވާ މައިކްރޯމެކްސް އަދި ލާވާ ފަދަ ކުންފުނިތައް ވެސް ބާޒާރުގައި ވާދަވެރި ގޮތެއްގައި ކުރިއަރަމުންދާކަމަށް ވަނީ ފާހަގަކުރެވިފަ އެވެ.
އިންޑިއާގެ މި ކުރިއެރުމަކީ ގްލޯބަލް އިލެކްޓްރޯނިކްސް ސަޕްލައި ޗެއިންގައި އެ ގައުމުގެ ދައުރު އިތުރުވެގެންދާނެ ކަމެއްކަމަށް ތަޖުރިބާކާރުން ލަފާކުރެ އެވެ. އަދި މިކަމުގެ ސަބަބުން ވަޒީފާގެ ފުރުސަތުތައް އިތުރުވެ، އިގްތިސޯދީ ކުރިއެރުން ވެސް ލިބިގެންދާނެކަމަށް ބެލެވެ އެވެ.
