ޓްރާންސްފޯމަރު ވަގު ހުއްޓުވި ސްޓެލްކޯގެ މުވައްޒަފަށް މެޑަލް އޮފް ބްރޭވަރީ ދީފި
ހުޅުމާލޭގައި ހުންނަ ސްޓެލްކޯގެ ޓްރާންސްފޯމަރަކަށް ގެއްލުންދީ އޭގެން ވައްކަން ކުރަން އުޅެނިކޮށް އެކަން ހުއްޓުވި އެ ކުންފުނީގެ މުވައްޒަފަށް މެޑަލް އޮފް ބްރޭވަރިގެ ދީފި އެވެ.
ރޭ ހިނގި އެ ހާދިސާގައި ވަގު ހުއްޓުވަން އުޅުމުން އޭނާ ވަނީ ސްޓެލްކޯގެ މުވައްޒަފެއްގެ ގައިގައި އެ މީހާ ރެންޗުން ޖަހައި ޒަހަމްވެސްކޮށްލައިފަ އެވެ.
އެހެންވެ މިއަދު ވަނީ އެ މުވައްޒަފު ކުރި މަސައްކަތް ފާހަގަކޮށް ސްޓެލްކޯގެ އެމްޑީ ހުސެއިން ފަހުމީގެ އަތް ޕުޅުން އޭނާއަށް އެ މެޑަލް އަރުވައިފަ އެވެ.
މިއީ އެ މުވައްޒަފު ދެއްކި ހިތްވަރާއި އަދި ފުރާނައަށް ނުރައްކާވި ދަނޑިވަޅު ވެސް މަސައްކަތުގެ ޒިންމާ އަދާކޮށްފައިވާތީ އެކަން ފާހަގަކުރުމުގެ ގޮތުން ދިން އެވޯޑެއް ކަމަށް ސްޓެލްކޯއިން ބުނެފައިވެ އެވެ.
ސްޓެލްކޯއިން ބުނީ އެ ކުންފުނީގެ މުވައްޒަފުންގެ ރައްކާތެރިކަން ކަށަވަރުކުރުމުގެ ގޮތުން ރޭ ދިމާވި ފަދަ މައްސަލަަތައް ވަރަށް ސީރިއަސްކޮށް ނަގާނެ ކަމަށެވެ،
ރޭ ޓްރާންސްޕޯމަރު ވަގަށް ނަގަން އުޅުނު މީހާ މިހާރު ހުރީ ފުލުހުންގެ ބެލުމުގެ ދަށުގަ އެވެ.
އެ މައްސަލަ އާ ގުޅިގެން ހައްޔަރުކުރީ ށ. ބިލެތްފަހި، ޗަނބޭލީގެ، އިބްރާހީމް ޒާލިފް (37އ) އެވެ.
ޓްރާންސްފޯމަރުތަކަށް ގެއްލުންދީ، ވައްކަން ކުރުން އާންމު ކަމަށް ވަނީ ވެފަ އެވެ. ހޮނިހިރު ދުވަހު ފޭސް ދޭއްގައި ހުންނަ ހައި ވޯލްޓޭޖް ދެ ޓްރާންސްފޯމަރަކަށް ގެއްލުންދީ އޭގެ ބައިތަކެއް ވަގަށް ނެގި އެވެ. ހުސްވި އަހަރު ޓްރާންސްފޯމަރަށް ގެއްލުން ދޭން އުޅެނިކޮށް ކަރަންޓުގައި ޖެހި މީހަކު މަރު ވެސް ވި އެވެ.
