ކޮވިޑް ބަލިން މަލައިކާ ރަނގަޅު ވެއްޖެ! ބުނީ އެންމެ ދެރަވީ ދަރިފުޅާ، ގެންގުޅޭ ކުއްތާއާއި ދުރުގައި ހުންނަން ޖެހުނީމަ ކަމަށް!
ކޮވިޑް-19 އަށް ފައްސިވީ ބޮލީވުޑްގެ އެކްޓްރެސް މަލައިކާ އަރޯރޯ އެބަލިން އެއްކޮށް ފަސޭހަ ވެއްޖެކަން އިއުލާނު ކޮށްފިއެވެ
މަލައިކާ ކޮވިޑަށް ފައްސިކަން އެނގިފައިވަނީ މިމަހުގެ 6 ވަނަ ދުވަހުގައެވެ. އޭނާގެ ލޯބިވެރިޔާ އަރްޖުން ކަޕޫރު ވެސް ކޮވިޑަށް ފައްސިކަން ހާމަވެފައި ވަނީ އެދުވަހުގައެވެ. އެދެމީހުން ވެސް ބައްޔަށް ފަރުވާ ހޯދާފައިވަނީ ހޯމް ކަރަންޓީނުގައި ތިބެގެންނެވެ.
އިންޑިއާގެ ރިޕޯޓުތަކުން ބުނެފައިވާ ގޮތުގައި މަލައިކާ ކޮވިޑަށް ފައްސިވުމުން އެންމެ ބޮޑަށް ދެރަވީ އޭނާގެ ދަރިފުޅާއި އޭނާ ގެންގުޅޭ ކުއްތާ އާއި ދުރުގައި ހުންނަން ޖެހުމުންނެވެ.
އެގޮތުން މަލައިކާ ވަނީ ކޮޓަރީގައި އޭނާ އެކަހެރި ވެގެން އޮތް އިރު، ކުޑަދޮރުން ދަރިފުޅާ އޭނަަގެ ކުއްތާ ބަލަން ތިބި ފޮޓޯއެއް ވެސް މީގެކުރިން އާއްމު ކޮށްފައެވެ.
ނަމަވެސް ކަރަންޓީނުގެ މުއްދަތު ފުރިހަމަ ކުރުމަށް ފަހު މިހާރު މިބަލިން ފަސޭހަވުމުން، މަލައިކާ މިއަދު ވަނީ އޭނަގެ ކޮޓަރިން ނިކުމެގެން ވެސް ފޮޓޯއެއް ނަގާ ހިއްސާ ކޮށްފައެވެ. މަލައިކާ އަށް ސިއްޙީ ފަރުވާދިން ހުރިހާ ޚިދުމަތްތެރީންނަށް އޭނާ ވަނީ ޝުކުރު އަދާ ކޮށްފައެވެ.
މީގެއިތުރުން އޭނާގެ އާއިލާއަށާއި، މިދަތި ވަގުތުގައި އެހީތެރިވެދިން ގާތް އެންމެންގެ އިތުރުން އޭނާއަަށް ހެޔޮ ދުޢާކުރި އެންމެންނަށް ވެސް މަލައިކާ ވަނީ ޝުކުރު އަދާ ކޮށްފައެވެ.
ކޮވިޑް ބަލިން މަލައިކާ މިހާރު ފަސޭހަ ވެފައިވާއިރު، އޭނާގެ ލޯބިވެރިޔާ އަރްޖުން ކަޕޫރުގެ ޙާލު ހުރި ގޮތެއް އަދި ހާމަ ކޮށްފައެއް ނުވެއެވެ.
Ads by STO
