ކަރީނާ އަށް އެކަންޏެއް ނޫން، ރަންވީރްގެ މައިންބަފައިންގެ ކައިވެންޏަށް ވެސް 40 އަހަރު ފުރިއްޖެ!
މިއަދަކީ ބޮލީވުގައި ވަރަށް ޚާއްސަ ދުވަހެކެވެ. މަޝްހޫރު އެކްޓްރެސް ކަރީނާ ކަޕޫރް ޚާން އަށް 40 އަހަރު ފުރުމުގެ އުފާވެރިކަން ފާޅު ކުރަމުންދާއިރު، އެދާއިރާގެ އެހެން ތަރިއެއް ވެސް ދަނީ 40 އެއް ފާހަގަ ކުރަމުންނެވެ. ނަމަވެސް އުމުރުގެ ގޮތަކުން ނޫނެވެ. އޭނާގެ މައިންބަފައިންގެ ކައިވެންޏަށް 40 އަހަރު ފުރިގެންނެވެ.
މަޝްހޫރު އެކްޓަރ ރަންވީރް ސިންގް މިއަދު އޭނާގެ އިންސްޓަގްރާމްގައި ވަނީ ވަރަށް އަސަރުގަދަ ޕޯސްޓެއް ކޮށްފައެވެ. އޮން ސްކްރީންގައާއި އޮފް ސްކްރީން ގައި ވެސް ގިނަ މީހުން ހެއްވާލުމުގެ ކުޅަދާނަކަން ލިބިފައިވާ ރަންވީރަކީ އަބަދުވެސް މީސްމީޑިއާގައި އޭނާގެ ޙަޔާތާއި ގުޅުން ހުންނަ ފޮޓޯތައް ހިއްސާ ކުރާ އެކްޓަރެކެވެ.
އެގޮތުން މިއަދު ވެސް ރަންވީރް ވަނީ އޭނަގެ ޙަޔާތާއި ގުޅޭ ކަންތައްތަކެއް ހިއްސާ ކޮށްފައެވެ. އެގޮތުން އޭނާގެ މައިންބަފައިންގެ ދެ ފޮޓޯއެއް ރަންވީރް ވަނީ އާއްމުކޮށްފައެވެ. އޭގެތެރެއިން އެއް ފޮޓޯގަނޑު ހުރީ ހުދާއި ކަޅުންނެވެ. ރަންވީރްގެ މައިންބަފައިން އެފޮޓޯގައި ފެންނަނީ ވަރަށް އުފަލުން، ހެވިދިލިފައި ތިއްބައެވެ.
ދެވަނަ ފޮޓޯ ހީވަނީ ވަރަށް ފަހުން ނެގި ފޮޓޯއެއް ހެންނެވެ. ދެފޮޓޯގެ ކެޕްޝަނަކަށް ރަންވީރު ލިޔެފައިވަނީ އޭނާގެ މައިންބަފައިން އެކުގައި އުޅޭތާ 40 އަހަރު ފުރުނީ ކަމަށެވެ.
ރަންވީރް އެންމެ ފަހުން ފެނިފައިވަނީ އޭނަގެ އަންހެނުން އަދި މަޝްހޫރު އެކްޓްރެސް ދިޕިކާ ޕަދުކޯން އާއެކު އިޝްތިހާރަކުންނެވެ. މީގެއިތުރުން ފިލްމު "ޖަޔެޝްބާއީ ޖޯރްދާރް" ގެ ޑަބިންގ ގެ މަސައްކަތް މިހާރު ފަށާފައިވާއިރު ރަންވީރް ހަރަކާތްތެރިވާ "83" މިއަހަރު ޑިސެމްބަރުގައި ރިލީސް ވާނެ ކަމަށް ބޮލީވުޑްގެ ޚަބަރުތައް ބުނެއެވެ.
