ރައްޔިތުންނަށް އެއް އުސޫލެއް، ބޮޑުންނަށް ވަކި އުސޫލެއް އޮންނަ އޮތުން ދޫކޮށްލާ: އިދިކޮޅު
ކޮވިޑް-19 ގެ ހާލަތާއި ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަޅާފައިވާ ފިޔަވަޅުތަކުގެ ތެރެއިން، ރާއްޖެއިން ބޭރުގައި އުޅުމަށްފަހު އެނބުރި އަންނަ ފަރާތްތަކުން 14 ދުވަހުގެ ކަރަންޓީނަށް ދާން ޖެހޭއިރު، ސަރުކާރުގެ ބައެއް އިސްވެރިން އެފިޔަވަޅަށް ޢަމަލު ނުކުރައްވާކަން އިދިކޮޅުން ފާހަގަ ކޮށްފިއެވެ.
އެގޮތުން ޕީޕީއެން/ޕީއެންސީ އިން މިއަދު ނެރުނު ބަޔާނެއްގައި ބުނެފައިވަނީ އެފިޔަވަޅަށް ސަރުކާރުގެ ބައެއް އިސްވެރިން ޢަމަލު ނުކުރުން ބަލައި ނުގަންނަ ކަމަށެވެ.
އިދިކޮޅު ކޯލިޝަނުން މިކަން ފާހަގަ ކޮށްފައި މިވަނީ ވަރަށް ފަހުން ޚާރިޖީ ވަޒީރު ޢަބްދުﷲ ޝާހިދު އަމިއްލަފުޅު ދަތުރެއްގަައި ރާއްޖެއިން ބޭރަށް ވަޑައިގަތުމަށް ފަހު މިމަހުގެ 19 ވަނަ ދުވަހު އެނބުރި ރާއްޖެ އައިސް، އިއްޔެ އޮތް އިވެންޓެއްގައި ބައިވެރިވުމާއި ގުޅިގެންނެވެ.
އެކަމާއި އާއްމު ރައްޔިތުން ވެސް ފާޑުކިޔާފައިވާއިރު، ޚާރިޖީ ވަޒީރު ވަނީ އެޗްޕީއޭ ގެ ޢާއްމު ގައިޑްލައިނާއި ޚިލާފުވެ ވަޑައިގެންފައި ކަމަށާއި އެތައް ބަޔަކު ނުރައްކަލަކަށް ވެސް ހުށަހަޅާފައިވާ ކަމަށް އިދިކޮޅުން ވަނީ ފާހަގަ ކޮށްފައެވެ.
"މިފަދަ ޣައިރު ޒިންމާދާރު ޢަމަލުތައް ސަރުކާރުގެ އެންމެ އިސްވެރިންގެ ކިބައިން ފެނުމަކީ މިޕާޓީން ކަންބޮޑުވާ ކަމެެއް. އަދި ސަރުކާރު ހިންގާ ޕާޓީއަށް ނިސްބަތްވާ އެކި ފަރާތްތަކުން އެޗްޕީއޭ ގެ ގައިޑްލައިނާ ޚިލާފު ވަމުން ދާއިރު އެއްވެސް ފިޔަވަޅެއް އަޅަން އެޗްޕީއޭ އިން ނުކުޅެދިފައިވާކަން ހިތާމައާއެކު ފާހަގަ ކުރަން. ރައްޔިތުންނަށް އެއް އުޞޫލެއް، ބޮޑުންނަށް ވަކި އުޞޫލެއް އޮންނަ އޮތުން ވަގުތުން ވަގުތަށް ދޫކޮށްލާ" އިދިކޮޅުން ބުނެފައިވެއެެވެ.
Ads by STO
