އަދީބުގެ ދައުވާތައް ބާތިލުކުރި ގާޒީ ސަސްޕެންޝަންގެ މުއްދަތު ހަމަވެ އެނބުރި ވަޒީފާއަށް
ކުރީގެ ނައިބު ރައީސް އަހުމަދު އަދީބު ގެ މައްޗަށް ދައުލަތުން ކުރި ހަތް ދައުވާއެއް ބާތިލުކުރި މައްސަލައިގައި ސަސްޕެންޑު ކުރި ގާޒީ އިސްމާއިލް ރަޝީދު، ސަސްޕެންޝަންގެ މުއްދަތު ހަމަކޮށް އެނބުރި ވަޒީފާއަށް ނުކުމެއްޖެއެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ބޮޑު ޚިޔާނާތާއި ގުޅިގެން އަދީބުގެ މައްޗަށް އުފުލި ހަތް ދައުވާ ގާޒީ އިސްމާއިލް ރަޝީދު ބާތިލުކުރެއްވީ އަދީބާއެކު ދައުލަތުން ހެދި އިއުތިރާފު އެއްބަސްވުންތަކާ ބެހޭގޮތުން މައްސަލައިގެ އިބްތިދާއީ މަރުހަލާގައި، ގޮތެއް ނިންމަވަމުންނެވެ.
ނަމަވެސް ކްރިމިނަލް ކޯޓުން އެދައުވާތައް ބޭރުކޮށްލުމުން، އެމައްސަލަ ބަލައި ދެއްވުމަށް ޕްރޮސެކިއުޓާ ޖެނެރަލް (ޕީޖީ) ގެ އޮފީހުން ޖުޑީޝަލް ސާވިސް ކޮމިޝަން (ޖޭއެސްސީ) އަށް މައްސަލަ ހުށަހެޅުއްވިއެވެ. އަދި ޖޭއެސްސީން ވަނީ ގާޒީ އިސްމާއިލް ރަޝީދު ދެ މަސް ދުވަހަށް ސަސްޕެންޑު ކޮށްފައެވެ.
ސަސްޕެންޝަންގެ މުއްދަތު ހަމަވެ، ގާޒީ އިސްމާއިލް ވަނީ މިއަދު ވަޒީފާއަށް ނުކުންނަވާފައެވެ. ޖޭއެސްސީން ބުނެފައިވަނީ ގާޒީ އިސްމާއިލް ގެ މައްސަލަ މިހާރު ނިމުމަކާއި ގާތް ވެފައިވާ ކަމަށެވެ.
ކްރިމިނަލް ކޯޓުން އެމައްސަލަ ބޭރުކޮށްލި މައްސަލަ ދައުލަތުން ހައިކޯޓުގައި އިސްތިއުނާފުކޮށް މިއަދު ވަނީ އެމައްސަލައިގެ ހުކުމް ވެސް އިއްވާފައެވެ. އެގޮތުން ހައިކޯޓުން އަމުރުކޮށްފައި ވަނީ 15 ދުވަހަށް އަދީބު ރިމާންޑު ޖަލެއްގައި ބެހެއްޓުމަށާއި، ކްރިމިނަލް ކޯޓުން އަލުން އެމައްސަލަ ބެލުމަށެވެ.
