ކޮވިޑުގެ މިހާލަތުގައި ބައެއް ހޮސްޕިޓަލުތަކުން އުޅެނީ ގިނަ ފައިސާ ހޯދާށޭ މީހުން ބުނި، އެއީ ހަމަ ތެދެއް: ޒަރީން ޚާން
ކޮވިޑް-19 ގެ މިބަލިމަޑުކަމާއި ގުޅިގެން އިންޑިއާގެ ބައެއް ހޮސްޕިޓަލު ތަކުން އުޅެނީ ގިނައިން ފައިސާ ނެގޭތޯ ކަމަށް ބޮލީވުޑް ގެ އެކްޓްރެސް ޒަރީން ޚާން ބުނެފިއެވެ.
އިންސްޓަގްރާމް މެދުވެރިކޮށް ޒަރީން ވަނީ އިންޑިއާގެ ލީލާވަތީ ހޮސްޕިޓަލުން ރޭގައި އޭނައަށް ކުރަން ޖެހުނު ހިތި ތަޖުރިބާއެއް ހިއްސާ ކޮށްފައެވެ.
އެގޮތުން ޒަރީން ބުނީ އޭނާގެ ކާފަގެ ދަށްބަނޑުގައި ވަރަށް ބޮޑަށް ރިއްސާތީ، އިތުރު އެހެން ގޮތެއް ނެތިގެން ކާފައާއި، ބޮޑުބޭބެ އާއެކު އެހޮސްޕިޓަލަށް ދިޔަ ކަމަަށެވެ.
ޒަރީންމެން ބޭނުންވީ ކެޝުއަލްޓީ އަށް ގޮސް ދައްކާށެވެ. ނަމަވެސް ކޮވިޑް ގެ ދުވަސްވަރު ކަމުން ފުރަތަމަ ޖެހުނީ ބަލީގެ އަލާމާތެއް ހުރިތޯ ބެލުމަށް އެކަމަށްޓަކައި ޚާއްސަ ކޮށްފައިހުރި ތަނަށް ދާން ކަމަށް ޒަރީން ބުންޏެވެ.
އެތަނުގެ އެތެރޭގައި ތިބީ ހުސް ކޮވިޑް ބަލީގެ މީހުން ކަމަށްވާތީ އާއި ޒަރީންގެ ކާފައަކީ އުމުރުން 87 އަހަރުގެ ހައި ރިސްކު މީހަކަށް ވާތީ، އެތަނުގެ އެތެރެއަށް ނުވަންނަ ކަމަށް ވެސް ޒަރީން ބުންޏެވެ. އަދި އަލާމާތެއް ހުރިތޯ ހުން ހުރިވަރު ބެލި ކަމަށާއި އޮކްސިޖަން ލެވެލް ވެސް ބެލި ކަމަށް ބުންޏެވެ. އެހުރިހާ އެއްޗެއް ވެސް ނޯމަލް ކަމަށް ވެސް ބުންޏެވެ.
"ކާފަ އިންފެކްޓު ވެދާނެތީ އަހަރުމެން ނުވެސް އިށީންނަން. ނަރުސް ކުއްޖާ އައިސްފައި ބުނީ ކޮވިޑަށް ޓެސްޓު ކުރާށޭ ޖެހޭނީ ފުރަތަމަ ވެސް. އޭގެ ކުރިން ކެޝުއަލްޓީ އަށް ނުފޮނުވޭނޭ. އަހަރެން ބުނިން ހުމެއް ވެސް ނެތެއް ނޫންހޭ، އޮކްސިޖަން ލެވެލް ވެސް ރަނގަޅު ނޫންހޭ. ކާފައަކީ މުސްކުޅިއެކޭ. ލޮކްޑައުންގައި ބޭރަކަށް ވެސް ނުނިކުމެޔޭ. މިވަގުތު އެހުރީ ވަރަށް ބޮޑަށް ފަރުވާ ބޭނުން ވެފައޭ. އެކަމަކު ވެސް ބުނީ ޓެސްޓުތައް ހަދާފައި، ސީޓީ ސްކޭނެއް ވެސް ހެދީމައޭ އިތުރު ފަރުވާއާއި ހަމައަށް ދެވޭނީ" ޒަރީން ބުންޏެވެ.
ޒަރީން ބުނީ އިންޑިއާގެ ހޮސްޕިޓަލުތަކުން މިދުވަސްކޮޅު މީހުން އަތުން އިތުރަށް ފައިސާ ހޯދަން އުޅޭކަން ކުރިން ހަމައެކަނި އިވުނީ ކަމަށާއި މިހާރު އެކަން ތަޖުރިބާ ވެސް ކުރެވިއްޖެ ކަމަށެވެ.
