ކޮވިޑް-19: ހޯރަފުށިން މީހަކު ފައްސިވެއްޖެ
ހއ. ހޯރަފުށިން މީހަކު ކޮވިޑަށް ފައްސި ވެއްޖެއެވެ.
އެރަށުން މީހަކު ކޮވިޑަށް ފައްސިވެފައިވާކަން ހާމަކުރައްވަމުން ތިލަދުންމަތީ އުތުރުބުރީ ހޯރަފުށީ ކައުންސިލްގެ އިދާރާއިން ނެރުނު ބަޔާނެއްގައި ބުނެފައިވަނީ، ފައްސި ވެފައިވަނީ ހޯމް ކަރަންޓީނުގައި ހުރި މީހެއް ކަމަށެވެ.
އެގޮތުން އެމީހާ ފައްސިކަން އެނގިފައިވަނީ ކަރަންޓީނުގައި ހުރި ފަރާތްތަކުގެ ތެރެއިން، 14 ދުވަހުގެ ކަރަންޓީނު މުއްދަތު ހަމަވުމުން ސާމްޕަލް ނަގައި ޓެސްޓުކުރި ފަރާތެއް ކަމަށް ވެސް އެބަޔާނުގައިވެއެވެ.
ފައްސިވީ ފަރާތް ކަރަންޓީނުގައި ހުރީ މިމަހުގެ 9 އިން ފެށިގެން ކަމަށް ވެސް އެކައުންސިލުން ވަނީ ބުނެފައެވެ.
ފައްސިވެފައި ވަނީ ކަރަންޓީނުގައި ހުރި މީހެއް ނަމަވެސް، މިހާލަތުގައި ގެއިން ބޭރުގައި އުޅޭއިރު އިޖުތިމާޢީ ގައިދުރުކަން ބެހެއްޓުމަށާއި މާސްކު އެޅުމަށް ސަމާލުކަން ދިނުމަށް ވެސް އެކައުންސިލުން ވަނީ އިލްތިމާސް ކޮށްފައެވެ.
ތިލަދުންމަތީ އުރުރުބުރިއާއި ދެކުނުބުރިން މީގެ ކުރިންވެސް ވަނީ ކޮވިޑަށް ފައްސި ކޭސްތަކެއް ފެނިފައެވެ. އެގޮތުން ހދ. ދިއްދޫ، ހއ. ކެލާއިން ވެސް މީގެކުރިން މީހުން ކޮވިޑަށް ފައްސިވެފައިވާއިރު ރޭ ހދ. ކުޅުދުއްފުށިން ވެސް ކޯވިޑަށް ފައްސި ދެ ކޭސް ފެނިފައެވެ.
ރާއްޖެއިން މިބަލި ޖެހުނު މީހުންގެ ޢަދަދު މިހާރު ވަނީ 10،014 އަށް އަރާފައެވެ.
