ރަކުލް ޕްރީތުގެ ރުޅިގަނޑު މީޑިއާތަކަށް: މައްސަލައާ ބެހޭގޮތުން ލިޔުން މަނާ ކުރަން ހައިކޯޓަށް މައްސަލަ ހުށަހަޅައިފި
ބޮލީވުޑްގެ އެކްޓަރ ސުޝާންތު ސިންގް ރާޖްޕޫތު މަރުވުމާއި ގުޅިގެން ހިންގަން ފެށި ތަހުގީގުގައި، ފެންމަތިވެފައިމިވާ މަސްތުވާތަކެތީގެ މައްސަލަ މީޑިއާތަކުން ގެނެސްދޭތީ އެކަން ހުއްޓުވަން ރަކުލް ޕްރީތު މަސައްކަތް ފަށައިފިއެވެ.
ރަކުލް ޕްރީތަކީ ވެސް މިމައްސަލައިގައި ތުހުމަތުކުރެވި ސުވާލު ކުރެވިފައިވާ އެކެކެވެ. އެގޮތުން ސުޝާންތަށް މަސްތުވާތަކެތި ހޯދައިދީ، އަމިއްލައަށް ވެސް އެބޭނުން ކުރިކަން ހާމަވުމާއިއެކު ނާކޮޓިކްސް ކޮންޓްރޯލް ބިއުރޯ (އެންސީބީ) އިން ހައްޔަރު ކޮށްފައިވާ ރިއާ ޗަކްރަބަތީ ވަނީ، ރަކުލް ވެސް އޭނާ އަތުން މަސްތުވާތަކެތި ހޯދި ކަމަށާއި ބޭނުން ކުރާ ކަމަށް ވެސް އެންސީބީއަށް މައުލޫމާތު ދީފައެވެ. އަދި ރަކުލް ވަނީ ރިއާ އަތުން އެތަކެތި ހޯދިކަމަށް އެއްބަސް ވެފައެވެ.
މިމައްސަލަ އިންޑިއާގެ ހުރިހާ މީޑިއާ އަކުން ވެސް އަންނަނީ މިކަމުގެ މައުލޫމާތު ގެނެސް ދެމުންނެވެ. އެހެންކަމުން ރިއާ އާއި ގުޅިފައިވާ ރަކުލް ގެ މިމައްސަލަ މީޑިއާތަކުން ގެނެސް ދިނުމާއި ލިޔުން ވެސް މަނާ ކުރުމަށް އެދި ރަކުލް ޕްރީތު މިހާރު ވަނީ ނިއު ދިއްލީގެ ހައި ކޯޓަށް މައްސަލަ ހުށަހަޅާފައެވެ. އަދި މިމައްސަލައިގެ އަޑުއެހުންތައް އަންނަ ހަފްތާގައި ބާއްވަން ފަށާނެ ކަމަށް ރިޕޯޓުތަކުން ބުނެއެވެ.
ރަކުލް ޕްރީތް މިފަދައިން އެދިފައި ވަނީ ބައެއް މީޑިއާތަކުން މިކަމާއި ގުޅޭގޮތުން ގެންގުޅޭ އުސޫލު، ނޫސްވެރިކަމުގެ މިންގަނޑުތަކާއި ޚިލާފު ކަމަށް ބުނެ، ބައެއް ޚަބަރުތައް އެންސީބީ ގެ އޮފިޝަލުންނަށް ވެސް އެނގުމުގެ ކުރިން މީޑިއާތަކުން ރިޕޯޓު ކޮށްފައިވާ ކަމަށް ބުނެއެވެ.
