ދާއިރާގެ ރައްޔިތެއްގެ ފޭސްބުކް ޕްރޮފައިލް ބެލުމުން މެންބަރު ޖެހުނީ 20 ރުފިޔާ ދައްކަވަން
ރައްޔިތުންގެ މަޖިލީހުގެ ފުވައްމުލަކު އުތުރު ދާއިރާގެ މެންބަރު މުހައްމަދު ރަޝީދު (ދޮންބެ ރަޝީދު) ދާއިރާގެ ރައްޔިތެއްގެ ފޭސްބުކް ޕްރޮފައިލްއަށް ވަދެ، އެ ޕްރޮފައިލް ބެލުމުން 20 ރުފިޔާ ދައްކަވަން ޖެހިއްޖެއެވެ.
"ކުދުބެއްޔާގެ ސަވާދު" ނަމަކަށް ކިޔާ މިމީހާގެ ފޭސްބުކް "ބަޔޯ"ގައި ވަނީ ޕްރޮޕައިލްއަށް ޒިޔާރަތްކުރާ ކޮންމެ ބޭފުޅަކުވެސް އޭނާގެ އެކައުންޓު ނަންބަރަށް 20 ރުފިޔާ ފޮނުވަން ޖެހޭނެ ކަމަށް ލިޔެފައެވެ. އަދި އޭނާގެ އެކައުންޓު ނަންބަރު ވެސް އޭނާގެ ފޭސްބުކް "ބަޔޯ" ގައި ޖަހާފައި ވެއެވެ.
މުހައްމަދު ރަޝީދު އިއްޔެގެ ވަގުތެއްގައިވަނީ ކުދުބެއްޔާގެ ސަވާދު ޓެގް ކުރައްވާ 20 ރުފިޔާ އޭނާގެ އެކައުންޓަށް ދެއްކިކަން އަންގައިދޭ ސްލިޕެއް ޕޯސްޓް ކުރައްވާފައެވެ. އަދި އެއީ ކުދުބެއްޔާގެ ސަވާދުގެ ފޭސްބުކް ޕްރޮފައިލަށް މިއަދު ކުރި ޒިޔާރަތުގައި ޗާރޖް ކުރި 20 ރުފިޔާ ކަމުގައިވެސް ބުނެފައި ވެއެވެ.
މީސްމީޑިއާގަައި މީހުން "މަޖަލަކަށް" ވެސް މިފަދަ ތަފާތު ކަންކަން ކޮށް އުޅެއެވެ. އަދި މެންބަރު ހުސައިން ރަޝީދު ފާހަގަ ކުރެވެނީ ފޭސްބުކުގައި އަދި މީސްމީޑިއާގެ އެހެން މަންސަތަކުގައި ވެސް ވަރަށް ގާތް ގުޅުމެއް ދާއިރާގެ ރައްޔިތުންނާއި ބާއްވާ ބޭފުޅެއްގެ ގޮތުގައެވެ.
Ads by STO
