އަދީބަށް ކުރާ ހަތް ދަޢުވާ މިއަދު ކްރިމިނަލް ކޯޓުގައި އަލުން ބަލަން ފަށަނީ
ކުރީގެ ނައިބު ރައީސް އަހުމަދު އަދީބު މައްޗަށް ދައުލަތުން އުފުލި ހަތް ދައުވާ އަލުން ބަލަން ހައިކޯޓުން ކުރި ހުކުމާ އެއްގޮތަށް އެމައްސަލަތައް ބެލުމަށް ކްރިމިނަލްކޯޓުގައި ތާވަލް ކޮށްފިއެވެ.
މި 7 ދައުވާގެ އަޑުއެހުން ތާވަލްކޮށްފައި ވަނީ މިއަދު މެންދުރުފަހު 15:00 އަށެވެ.
ކުރީގެ ނައިބު ރައީސް އަދީބުގެ މައްޗަށް އުފުލާފައިވަނީ މަނީ ލޯންޑަރިންގެ ދެ ދައުވާއެއްގެ އިތުރުން، ހިޔާނާތްތެރިވުމުގައި ބައިވެރިވުމުގެ ދެ ދައުވާއަކާއި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ދެ ދައުވާއަކާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއެކެވެ.
އަދީބުގެ މިހަތް ދައުވާ ވެސް އިބްތިދާޢީ އަޑުއެހުމުން ފެށިގެން އަލުން ބެލުމަށް ހައިކޯޓުން ކްރިމިނަލް ކޯޓުގެ މައްޗަށް އަމުރުކޮށްފައިވަނީ ސެޕްޓެމްބަރު 21 ވަނަ ދުވަހުއެވެ. އަދި އަދީބުގެ ދައުވާތައް އަލުން ބެލުމަށް ހައިކޯޓުން ޙުކުމް ކުރި ދުވަހުން ފެށިގެން 15 ދުވަހުގެ މުއްދަތަށް ރިމާޑް ޖަލެއްގައި އަދީބު ބެހެއްޓުމަށް ވެސް ހައިކޯޓުން އަމުކުރި އެވެ.
އެމްއެމްޕީއާރްސީ ގެ ޚިޔާނާތުގެ މި ހަތް ދައުވާ ވެސް ކްރިމިނަލް ކޯޓުން ބޭރުކޮށް އަދީބު މިނިވަން ކުރީ މިއަހަރުގެ ޖުލައި މަހުގެ 14 ވަަނަ ދުވަހުގައެވެ.
