ބީއެމްއެލްގެ ޑެބިޓް ކާޑުގެ ފޮރިން ލިމިޓް 1000 ޑޮލަރަށް ބޮޑުކޮށްފި
ބެންކް އޮފް މޯލްޑިވްސް (ބީއެމްއެލް)ގެ ޑެބިޓް ކާޑުން ރާއްޖޭން ބޭރުގައި ބޭނުން ކުރެވޭ ލިމިޓް މާދަމާއިން ފެށިގެން 1000 ޑޮލަރަށް އިތުރުވާނެ ކަމަށް އެ ބޭންކުން ބުނެފިއެވެ.
ބީއެމްއެލްއިން ބުނީ މި ބަދަލާ އެކު މާދަމާއިން ފެށިގެން ރާއްޖޭން ބޭރުގައި ކާޑު މެޝިން މެދުވެރިކޮށް ކުރާ މުއާމަލާތްތަކަށް މަހަކު 1000 ޑޮލަރުގެ ލިމިޓެއް ލިބޭނެ ކަމަށެވެ.
މި ބަދަލު ގެނައުމުގެ ކުރީގައި، ކޮވިޑު-19އިން ފެށިގެން ލިބެމުން އައީ 250 ޑޮލަރުގެ ލިމިޓެކެވެ. ނަމަވެސް ޖުލައި މަހުން ފެށިގެން އެ ލިމިޓް ވަނީ 500 ޑޮލަރަށް ބޮޑުކޮށްފައެވެ.
އޭގެ އިތުރުން ބީއެމްއެލްއިން ވަނީ ބޭސްފަރުވާގެ ބޭނުމަށާއި، ދަތުރުފަތުރުގެ ބޭނުމަށް ބޭރުގައި ކުރެވޭ މިންވަރު، މަހަކު 3000 ޑޮލަރަށް ބޮޑުކޮށްފައެވެ.
އެ ބަދަލާ އެކު ރާއްޖޭން ބޭރަށް ދަތުރުކުރާ ބީއެމްއެލްގެ ކަސްޓަމަރުންގެ އެކައުންޓުގައި ދިވެހި ރުފިޔާ ހުރެއްޖެ ނަމަ، އެއާލައިންތަކުގެ ސައިޓްތަކުން ޑައިރެކްޓްކޮށް ދުރާލާ ޓިކެޓު ގަތުމުގެ ފުރުސަތު ލިބޭނެއެވެ. އަދި ކާޑުން ހޮޓަލަށް ފައިސާ ދެއްކުމުގެ ގާބިލުކަން ވެސް އިތުރުވެގެން ދާނެއެވެ.

