މައްސަލަ ނިމެންދެން އަދީބު ބަންދުގައި ބަހައްޓަން ނިންމައިފި!
ކކުރީގެ ނައިބު ރައީސް އަޙުމަދު އަދީބު ޢަބްދުލްޤަފޫރްގެ މައްޗަށް ދައުލަތުން އުފުލާފައިވާ ދައުވާތަކުގެ މައްސަލަ ނިމެންދެން އަދިވެސް ބަންދުގައި ބެހެއްޓުމަަށް މިއަދުގެ ޝަރީޢަތުން ނިންމަވައިފިއެވެ.
ދައުލަތުގެ ފަރާތުން އަދީބުގެ މައްޗަށް ހަތް ދައުވާއެއް އުފުލާފައިވާއިރު އެދައުވާތަކަށް އަދީބު ވަނީ އެހަތް ދައުވާ އަށް ވެސް އިއުތުރާފު ވެސް ވެވަޑައިގެންފައެވެ. އަދި މައްސަލަ ބަަލައި ނިމެންދެން އަދީބު ބަންދުގައި ބެހެއްޓުމާއިމެދު ވެސް އޭނާ އިއުތިރާޒްވެ ވަޑައިގެންފައެއް ނުވެއެވެ.
ކްރިމިނަލް ކޯޓުގައި މިއަދު ކުރިއަށްދިޔަ ޝަރީއަތުގައި އަދީބަށް ދެއްވި ފުރުސަތުގައި އަދީބު ވިދާޅުވީ "އެމްއެމްޕީއާރްސީގެ މައްސަލާފައި ހުރިހާ ވާހަކައެއްވެސް ތެދަށް ކިޔާދޭން ބޭނުންވާ" ކަމަށާއި އެއްވެސް މަޖުބޫރު ކަމެއް ނެތް ކަމަށެވެ.
މިމައްސަލައިގެ މިއަދުގެ އަޑުއެހުން ނިންމަވާލައްވަމުން ގާޒީ ވިދާޅުވީ ދައުވާ ލިބޭ ފަރާތް (އަދީބު) ގެ އިއުތިރާޒެއް ވެސް ނެތުމާއެކު، ބަންދުގައި މިހާރު ހުރި ހުރުން ދަމަހައްޓަން ނިންމަވާ ކަމަށާއި މިމައްސަލައިގެ އަވަސް ނިޔާ އިއްވުމަށްޓަކައި އަންނަ ހޯމަ ދުވަހު އަޑުއެހުމެއް ބޭއްވުމަށް ނިންމަވާ ކަމަށެވެ.
މިއަދުގެ އަޑުއެހުމުގައި އަދީބު ވިދާޅުވީ އެމްއެމްޕީއާރުސީ މެދުވެރިކޮށް ރަށްތައް ދޫކޮށް ހިޔާނާތުގެ އަމަލުތައް ހިންގަން ފެށުނީ 2014 ގެ ފަހުން ކުރީގެ ރައީސް އަބްދުﷲ ޔާމީންގެ ސީދާ އިރުޝާދުގެ ދަށުން ކަމަށެވެ. އަދި މި މައްސަލަ ފެންމަތިވި ފަހުން ވެސް އޭރުގެ ސަރުކާރުން މައްސަލަ އިންސާފުވެރިކޮށް ތަހުގީގު ކުރަން ބޭނުންވާ ކަމަށް އޭނާ ގަބޫލު ނުކުރައްވާ ކަމަށް ވެސް ވިދާޅުވިއެވެ. އޭރު އަމާޒަކަށް އޮތީ އަދީބު ހިމެނިވަޑައިގަންނަވާ ގޮތަށް ދެތިން ބޭފުޅަކަށް އަމާޒުކޮށް މައްސަލަ ނިންމާލަން ކަމަށް އަދީބު ވިދާޅުވިއެވެ.
މިސަރުކާރު އައި ފަހުން ޕްރޮސެކިއުޓާ ޖެނެރަލްގެ އޮފީހުން މައްސަލަ ބަލަމުން ދަނީ އިންސާފުވެރިކޮށް ކަމަށް ގަބޫލު ކުރައްވާ ކަމަށާއި އެހެންކަމުން މި މައްސަލަ ތަހުގީގު ކުރުމުގައި ދައުލަތަށް ފުރިހަމައަށް އެއްބާރުލުން ދޭން ބޭނުންވާ ކަމަށް ވެސް އަދީބު ވިދާޅުވެފައިވެއެވެ.
