ރައްކާތެރިކަމުގެ މިންގަނޑުތަކާއެކު ފިލްމު "ރާދޭ"ގެ ޝޫޓިން އަލުން ފަށަނީ
ބޮލީވުޑްގެ ސުޕަރސުޓަރ ސަލްމާންޚާން ލީޑްރޯލް ކުޅޭ ފިލްމް "ރާދޭ"ގެ ޝޫޓިން މެދުކަނޑާލާފައި އޮތުމަށްފަހު އަލުން ފަށަން ތައްޔާރު ވެއްޖެއެވެ.
އިންޑިއާގެ މީޑިއާތައް ރިޕޯޓް ކުރާ ގޮތުގައި ސަލްމާންގެ ކޮއްކޮ ސުހައިލް ޚާންއާއި ޅިޔަނު އަތުލް އަގުނިހޯތުރީ ޑައިރެކްޓްކުރާ މި ފިލްމުގެ ޝޫޓިން އޮކްޓޫބަރު މަހުގެ ދެވަނަ ދުވަހު ފަށާނެއެވެ.
މީޑިއާތައް ބުނާ ގޮތުގައި މި ފިލްމުގައި ހަރަކާތްތެރިވާ ކްރޫއާ ކާސްޓުން މިހާރު ވަނީ ކޮވިޑަށް ޓެސްޓް ކޮށްފައެވެ. އަދި އެންމެން ވެސް ބައްޔަށް ނެގެޓިވް ނަމަވެސް ޝޫޓިން ފެށުމުގެ ކުރިން ދެވަނަ ޓެސްޓެއް ވެސް ހެދުމަށް ވަނީ ހަމަޖެހިފައެވެ. މީގެ އިތުރުން 15 ދުވަހުން ނިންމުމަށް އަމާޒު ހިފާފައިވާ މި ޝޫޓިންއަށް ވަނީ ރައްކާތެރިކަމުގެ މިންގަނޑުތަކެއް ކަނޑައެޅިފައެވެ. އެގޮތުން ކޮންމެ ދުވަހަކު ދިގު ދަތުރުތައް ކުރުމުގެ ބަދަލުގައި މުމްބާއީގެ ބޭރުގައި ނަގާ މި ޝޫޓިންތަކަށް ކްރޫއާއި ކާސްޓުން ތިބުމަށް ގެއެއް ވަނީ ކުއްޔަށް ހިފާފައެވެ. އަދި ގެއިން ޝޫޓިންއަށް ދިޔުމަށް ޚާއްޞަ ވެހިކަލެއް ހަމަޖައްސާފައިވާއިރު ވަކި ޝެޑިއުލެއްގެ ދަށުން އެ ވެހިކަލް ސެނައިޓައިޒް ކުރާނެއެވެ.
މީގެ އިތުރުން ޝޫޓިންގެ ދުވަސްވަރު އެއްވެސް މީހަކަށް ފިލްމް ކުރޫ ނުވަތަ ކާސްޓުން ނޫން މީހަކާ ބައްދަލެއް ނުކުރެވޭނެއެވެ. ހަމައެހެންމެ ކުއްލިއަކަށް ދިމާވާ ކަމެއްގައި ފަރުވާ ދިނުމަށާއި ފިޔަވަޅު އެޅުމަށް ޑޮކްޓަރަކާ އިތުރު ޞިއްޙީ އޮފިޝަލެއް އެމްބިއުލެންސްގައި ތައްޔާރީ ހާލަތުގައި ޝޫޓިން ކުރާ ތަނުގައި ތިބޭނެއެވެ.
މި ފިލްމުގައި ސަލްމާންއާއެކު ހަރަކާތެރިވާ އަންހެން ތަރިއަކީ ދިޝާ ޕަޓާނީ އެވެ.
