ސަން ސިޔާމް ގްރޫޕުން ސްރީލަންކާއަށް ދެލައްކަ ޑޮލަރުގެ އެހީއެއް
ސްރީލަންކާއަށް ކުރިމަތިވެފައިވާ ކާރިސާއިން އަރައިގަތުމަށް އެހީތެރިވުމުގެ ގޮތުން، ރާއްޖޭގެ މަޝްހޫރު ވިޔަފާރި ގްރޫޕް ، ސަން ސިޔާމް ގްރޫޕުން 200،000 އެމެރިކާ ޑޮލަރު (3 މިލިއަނަށް ވުރެ ގިނަ ރުފިޔާ)ގެ އެހީއެއް ވެދިނުމަށް ނިންމައިފިއެވެ.
މި އެހީގެ ފުރަތަމަ ބަޔެއްގެ ގޮތުގައި 75،000 ޑޮލަރު ވަނީ މިއަދު ހަވާލުކޮށްފައެވެ.
މި އެހީގެ ރަމްޒީ ޗެކް ސްރީލަންކާގެ ހައި ކޮމިޝަނަރު މުޙައްމަދު ރިޒްވީ ހަސަންއާ ހަވާލުކުރެއްވީ ސަން ސިޔާމް ގްރޫޕްގެ ޗެއަރމަން އަޙްމަދު ސިޔާމް މުޙައްމަދެވެ. މިއީ ސްރީލަންކާގެ ރައްޔިތުންނަށް ދިމާވެފައިވާ ދަތިކަމުގައި އެހީތެރިކަމުގެ އަތެއް ދިއްކޮށްލުމަށް ސިޔާމް ގްރޫޕުން ކުރި މުހިންމު މަސައްކަތެކެވެ.
ސަން ސިޔާމް ގުރޫޕުން ދޭން ނިންމައިފައިވާ 200،000 ޑޮލަރުގެ އެހީގެ ތެރެއިން ބާކީ ބައިތައް ވެސް ކުރިއަށް އޮތް ތަނުގައި ހަވާލުކުރާނެކަން އެ ގުރޫޕުން ވަނީ ޔަގީންކޮށްދެއްވައިފައެވެ.
