ހަޑި ވާންވީ ރޭޕާއި ޒިނޭ އެވެ. ކައިވެންޏެއް ނޫނެވެ: ޝައިޚް ޒައިދު
ހަޑިވާންވީ ޒިނޭ އާއި ރޭޕް ކަމަށް ދީނީ އިލްމުވެރިޔާ އައްޝައިޚް އަލީ ޒައިދު ވިދާޅުވެއްޖެއެވެ.
ޝެއިޚް ކުރެއްވި ޓްވީޓެއްގައި ވިދާޅުވީ ރުހުމާއެކު، ﷲ ހުއްދަ ދެއްވާފައިވާ ހައްދުގެ ތެރޭގައި ތިބެ ކުރާ ކައިވެނި ހަޑިވެގެން ނުވާނެ ކަމަށެވެ.
"ހަޑި ވާންވީ ހަރާމް ގޮތުގައި، ހިންގާ ޒިނޭގެ އަމަލުތަކާއި ރޭޕްތަކެވެ." ޝެއިޚް ކުރެއްވި ޓްވީޓުގައި ވިދާޅުވިއެވެ.
އެގޮތުން ކައިވެންޏަކީ ﷲ ދެއްވި ބަރަކާތެއްކަން ވެސް ޝެއިޚް ގެ ޓްވީޓުގައި ފާހަގަކުރެއްވިއެވެ.
ޝެއިޚް އަލީ ޒައިދު މިގޮތަށް ޓްވީޓު ކުރައްވާފައި ވަނީ މަޝްހޫރު ވިޔަފާރިވެރިޔާ އަދި މާމިގިލި ދާއިރާގެ މަޖިލިސް މެންބަރު ގާސިމް އިތުރު ކައިވެންޏެއް ކުރުމާ ގުޅިގެން ގިނަ ބަޔަކު ފާޑުކިޔަމުން އަންނާތީ ކަމުގައި ބެލެވެއެވެ.
ގާސިމް ކައިވެނި ކުރައްވާފައިވަނީ ގާސިމް ނިސްބަތްވާ އދ. މާމިގިއްޔަށް ނިސްބަތްވާ "ރާނިޔާ" ނަމަކަށް ކިޔާ އަންހެނަކާއެވެ. ރާނިޔާ އަކީ ގާސިމް އާ އަޅާ ބަލާއިރު އުމުރުން ވަރަށް ހަގު ބޭކަނބަލެކެވެ. ރާނިޔާގެ އުމުރަނީ 21 އަހަރު ކަމަށް މައުލޫމާތު ލިބެއެވެ. ގާސިމްގެ އުމުރުން މިހާރު 70 އަހަރެވެ.
ގާސިމް ރާނިޔާ އާ ކައިވެނި ބައްލަވައިގެންނެވިއިރު ގާސިމްގެ ތިން އަނބިކަނބަލުން ތިއްބަވައެވެ.
