ދުވާފަރުގެ މަގުތަކުގައި ތާރު އެޅުމުގެ މަސައްކަތް ފަށަައިފި
ރ. ދުވާފަރުގެ މަގުހެދުމުގެ މަޝްރޫޢުގެ ދަށުން، މަގުތަކުގައި ތާރު އެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ފަށައިފިއެވެ.
އެމްޓީސީސީން ބުނެފައި ވަނީ މިހާތަނަށް މުޅި އެމަޝްރޫޢުގެ 77 އިންސައްތަ މަސައްކަތް ނިމިފައިވާ ކަމަށެވެ.
ދުވާފަރުގެ މަގުތަކުގައި ތާރު އެޅުމުގެ މިމަޝްރޫޢުގައި، ހިނގުމަށް 6،813 އަކަމީޓަރުގެ ސަރަހަދެއް ހެދުމާއި ދުއްވާ ގޮތަށް 25،513 އަކަމީޓަރުގެ ސަރަހައްދެއް ހެދުން ހިމެނެ އެވެ. މީގެ އިތުރުން މަގު ބައްތި ހަރުކުރުމާއި މަގުމަތީ ނިޝާންތައް ހަރުކުރުމުގެ މަސައްކަތް ވެސް މި މަޝްރޫއުގެ ދަށުން ކުރާނެ ކަމަށް އެމްޓީސީސީން މައުލޫމާތު ދީފައިވެއެވެ.
އެމްޓީސީސީން ބުނެފައިވާ ގޮތުގައި މިމަޝްރޫޢުއަށް 47.04 މިލިއަން ރުފިޔާ ޚަރަދު ވާނެއެވެ.
ދުވާފަރުގެ މަގު ހެދުމުގެ މަޝްރޫއުގެ ދެވަނަ ފިޔަވަހީގެ މަސައްކަތް އެމްޓީސީސީއާއި ހަވާލުކުރީ މިދިޔަ ސެޕްޓެމްބަރު މަހުގެ 14 ވަަނަ ދުވަހުގައެވެ.
މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގައި އެދުވަހު ބޭއްވި ރަސްމިއްޔާތުގައި އެ މިނިސްޓްރީގެ ފަރާތުން އެއްބަސްވުމުގައި ސޮއި ކުރެއްވީ ޑިރެކްޓާ ޖެނެރަލް ފާތުމަތު ޝާނާ ފާރޫގެވެ. އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމެވެ.
މި މަސައްކަތް އެމްޓީސީސީއާ ހަވާލުކޮށްފައިވަނީ 37.8 މިލިއަން ރުފިޔާ އަށެވެ.
