"ފަންނާނުން ކުރާ މަސައްކަތް އިތުރަށް ކުރިއެރުވުން އޮތީ އޯޑިއެންސްގެ އަތްމަތީގަ!"
ބޮލީވުޑްގެ މަޝްހޫރު އެކްޓަރ އަމީތާބު ބަޗަން ގެ ފިރިހެން ދަރި، އަބީޝޭކް ބަޗަން އަކީ މަސައްކަތެއް ނެތް މީހެއް ކަމަށް މީހަކު ބުނުމުން އެމީހާއަށް އަބީޝެކް ރައްދު ދީފިއެވެ.
ފިލްމު އިންޑަސްޓްރީގައި އަބީޝޭކް އަކީ ގިނަ ފިލްމު ތަކެއްގައި ނާކާމިޔާބީ އާއި ވެސް ކުރިމަތިލާން ޖެހިފައިވާ އެކްޓަރެކެވެ. އެކަމުގެ ސަބަބުން ވަރަށް ގިނަ މީހުންގެ ފާޑު ކިޔުންތަކާއި ވެސް އަބީޝޭކް އަށް ކުރިމަތިލާން ޖެހެއެވެ. ނަމަވެސް އޭނާއަކީ އަބަދުވެސް އޭނާއާއި ދިމާލަށް ބުނަން ޙައްޤުނުވާ ކަހަލަ އެއްޗެއް މީހަކު ބުނެފިނަމަ އެއަށް ރައްދު ދޭ މީހެކެވެ.
ކޮވިޑްގެ ހާލަތާއި ގުޅިގެން ބަންދު ކޮށްފައިވާ އިންޑިއާގެ ސިނަމާތައް މިމަހުގެ 15 ވަނަ ދުވަހު ހުޅުވާނެ ކަމަށް ސަރުކާރުން ނިންމި ނިންމުމާ ގުޅޭ ޚަބަރެއް ޓްވިޓާގައި ހިއްސާ ކުރަމުން އަބީޝޭކް ބުނެފައި ވަނީ އެއީ އޭނާއަށް މުޅި މިހަފްތާގައި ވެސް އިވުނު އެންމެ އުފާވެރި ޚަބަރު ކަމުގައެވެ.
އަބީޝޭކް އެހެން ބުނުމުން މީހަކު މީހަކު ވަނީ "އެހެން ނަމަވެސް އަބީޝޭކް އަކީ ކުރާނެ މަސައްކަތެއް ނެތް މީހެއް" ކަމަށް ބުނެފައެވެ.
އެމީހާއަށް ރައްދު ދެމުން އަބީޝޭކް ބުނީ ފަންނާނުން ކުރާ މަސައްކަތް އިތުރަށް ކުރިއެރުން އޮތީ އޯޑިއެންސްގެ އަތްމަތީގައި ކަމަށެވެ.
