ވިއްސާރައިގައި ގެއްލުން ލިބުނު ގެއެއްގެ ފުރާޅު، ފުލުހުން މަރާމާތުކޮށްދީފި
އައްޑޫ ސިޓީއަށް ކުރި ވިއްސާރައިގައި ގެއްލުން ލިބުނު ގެއެއްގެ ފުރާޅު، ފުލުހުން މަރާމާތުކޮށްދީފިއެވެ.
އައްޑޫ ސިޓީ ހިތަދޫ ޕޮލިސް ސްޓޭޝަނުން މިއަދު ފޭސްބުކުގައި ކުރި ޕޯސްޓެއްގައި ބުނީ، މިއަދު އައްޑުއަށް ކުރި ވިއްސާރައިގައި ސ.ހިތަދޫ / ބިނާޓުގޭގެ ފުރާޅު ހަލާކުވެ، ފުރާޅުން ގޭގެ ތެރެއަށް ފެން ފައިބައި ސީލިންގާއި ކޮޓަރި ތެރޭގައި ހުރި ތަކެއްޗަށް އެކިވަރުގެ ގެއްލުން ލިބުނު ކަމަށެވެ.
"ގޭގައި ދިރިއުޅޭ ފަރާތްތަކުން ފުލުހުންގެ އެހީތެރިކަމަށް އެދުމުން ފުރާޅު މަރާމާތު ކުރުމުގައި އައްޑޫ ސިޓީ ހިތަދޫ ޕޮލިސް އިން ވަނީ އެހީތެރިކަން ފޯރުކޮށްދީފައި" އައްޑޫ ސިޓީ ހިތަދޫގެ ފުލުހުން ބުންޏެވެ.
އެނގިފައިވާ ގޮތުން މީގެ ކުރިން ވެސް އެފަދަ ހާދިސާތަކާ ގުޅިގެން އައްޑޫގެ ފުލުހުން އާންމުންނަށް އެހީތެރިކަން ފޯރުކޮށްދީފައި ވެއެވެ.
ކުރިއަށްއޮތް 24 ގަޑިއިރު ދެކުނާއި މެދުރާއްޖެތެރޭގެ އެކި ހިސާބުތަކަށް ވިއްސާރަކުރާނެއެވެ. އަދި ދެކުނުގެ ބައެއް ރަށްތަކަށް ގުގުރުމާ އެކު ބޯކޮށް ވާރޭވެހުން އެކަށީގެންވާކަމަށާއި، އުތުރުގެ ބައެއް ރަށްތަކަށް ކެރީގެ އަސަރުފޯރާނެކަމަށް ލަފާކުރެވޭކަމަށް މޫސުމާ ބެހޭ ޤައުމީ އިދާރާއިން ބުނެފައިވެއެވެ.
