ޝްވެތާ ތިވާރީ އަށް 40 އަހަރު އެކަމަކު ހީވަނީ ދޮށީ ދަރިފުޅުގެ ކޮއްކޮހެން، އެހާ ޒުވާން!
އިއްޔެއަކީ އިންޑިއާގެ މަޝްހޫރު ޓީވީ ސްޓާރ ޝްވެތާ ތިވާރީގެ އުފަންދުވަހެވެ.
ގިނަ ބަޔަކު އެތައް އަހަރެއް ވަންދެން ބެލި މަގުބޫލު ސީރީޒް "ކަސޯޓީ ޒިންދަގީކީ (1)" ގައި "ޕްރޭނާ" ރޯލު ކުޅެގެން ގިނަ ބައެއްގެ ތަރުހީބު ލިބިފައިވާ ޕްރޭނާއަށް މިފުރުނީ 40 އަހަރެވެ.
އުމުރުން 40 އަހަރު ފުރިފައިވީ ނަމަވެސް ޝްވެތާ އަދިވެސް ފެންނަނީ ވަރަށް ވެސް ޒުވާން ކޮށެވެ. އުފަންދުވަސް ފާހަގަ ކުރުމަށް ދޮށީ ދަރިފުޅު ޕަލަކް ތިވާރީ އާއެކު އިއްޔެ ބޭރުގައި އުޅުނު ފޮޓޯތަކެއް ޝްވެތާ ވަނީ އިންސްޓަގްރާމްގައި ހިއްސާ ކޮށްފައެވެ.
އެފޮޓޯތައް ބަލާފައި ގިނަ މީހުން ބުނެފައި ވަނީ އެދެމައިންނަކީ މަންމަ އާއި ދަރިފުޅުހެން ހީނުވާ ކަމަށާއި ބޮޑަށް ހީވަނީ ދައްތައާއި ކޮއްކޮހެން ކަމަށެވެ.
ޝްވެތާ އަށް މިހާރު ދެ ކުދިން ލިބިފައިވާއިރު، ހަށިގަނޑަށާއި ރީތިކަމަށް އެހާ ބަލައިގެން އޭނާ އުޅެނީ ކިހިނެއްތޯ ވެސް ގިނަ މީހުން ސުވާލު ކޮށްފައިވެއެވެ.
ތަންކޮޅެއް ކުރީގެ އިންޓަވިއު އެއްގައި ޝްވެތާ ބުނެފައިވަނީ އޭނާ އެންމެ ފުރަތަމަ ކައިވެންޏެއް ކުރީ އުމުރުން 18 އަހަރުގައި ކަމަށާއި ޕަލަކް ލިބުނު އިރު އުމުރަކީ 19 އަހަރު ކަމަށެވެ.
ޝްވެތާގެ ދަރިފުޅު ޕަލަކް ވެސް މިހާރު ތައްޔާރުވަމުން ދަނީ އެކްޓިންގ ދާއިރާއަށް ވަންނާށެވެ. އެގޮތުން އޭނާ އެންމެ ފުރަތަމަ ކުޅުމަށް ހަމަޖެހިފައި ވަނީ "ރޯސީ" ނަމަކަށް ކިޔާ ބިރުވެރި ފިލްމެކެވެ. މިފިލްމުގައި އޭނާއާއެކު ހަރަކާތްތެރި ވާނީ ވިވޭކް އޮބްރޯއީ އެވެ.
Ads by STO
