އާހިލް އަށް އަނިޔާކުރި ބޮޑުބޭބެ އަކީ ފުލުހެއް ކަމުގައި ވިޔަސް އޭނާ އެދެނީ އިންސާފަށް!
ފުލުހަކު އޭނާއަށް ބޮޑުބޭބެ ކިޔާ ކުއްޖަކަށް ގެވެށި އަނިޔާ ކުރި މައްސަލައެއް ފެންމަތިވެއްޖެއެވެ. އެނގިފައިވާ ގޮތުގައި މުޙައްމަދު ސޮބާޙް ނަމަކަށް ކިޔާ ފުލުހަކު އަނިޔާ ކޮށްފައިވަނީ އޭނާގެ އަންހެން ކޮއްކޮގެ ދޮށީ ދަރި މުޙައްމަދު އާހިލް (18އ.) އަށެވެ.
"ދެން" އަށް މައުލޫމާތު ދެމުން އާހިލްގެ ބައްޕަފަރާތު ޢާއިލާ މީހަކު ބުނީ، އާހިލް އޭނާގެ މަންމަގެ ގެއަށް (ގ. ހާޒަލް ގައުސް އަށް) ދިޔައީ 5 އޮކްޓޯބަރު 2020 ގެ 20:00 ގައި، އޭނާގެ މަންމަ އާއި ބައްދަލު ކޮށްލަން ކަމަށެވެ.
"އޭނަގެ (އާހިލްގެ) މަންމަ އާއި ވާހަކަ ދައްކަން މަންމަގެ ކޮޓަރީ ތެރޭގައި އިންދާ ސޮބާޙު ގޮސް ދޮރުގަ ޓަކިޖެހީމަ ގޮސް ދޮރުވިތަނާ، ދިޔަގޮތަށް ގޮސް އާހިލްގެ އަނގަމަތީގައި ޖެހީ. ޖެހީމަ އާހިލް އޭނަ ކޮއްޕާލީމަ، އިސްތަށިގަނޑުގައި ހިފާ ބާއްވާފައި ސޮބާޙު އާއި އޭނަގެ ފިރިހެން ދަރި އާހިލް ގައިގަ ތެޅީ، ސޮބާޙުގެ ދަރި އަކީ 16 އަހަރުގެ ކުއްޖެއް" އެމީހާ ކިޔައިދިނެވެ.
އާހިލް އަށް އަނިޔާ ކުރަމުން ދިޔައިރު އޭނާގެ މަންމަ "ނުތަޅާށޭ" ބުނި ކަމަށާއި ނަމަވެސް އެއަށްވުރެ އިތުރަށް ކަމެއް ކޮށްފައި ނުވާކަން ވެސް އާއިލާގެ ފަރާތުން ވަނީ ފާހަގަ ކޮށްފައެވެ.
"ލިބުނު އަނިޔާތަކުގެ ސަބަބުން އިއްޔެ އާހިލް އާއި އޭނަގެ ބައްޕަ ވަނީ އައިޖީއެމްއެޗަށް ގޮސް ޑޮކްޓަރަށް ދައްކާފަ. ޝަހީދު ޙުސެއިން އާދަމް ބިލްޑިންގަށް ގޮސް މައްސަލަ ވެސް ޖައްސާފަ ވަނީ. ފުލުހުން ބުނީ މައްސަލަ ބަލާނަމޭ. މިއަދު ޖެންޑާއަށް ވެސް ގޮސްވީ" މައުލޫމާތު ދިން މީހާ ބުންޏެވެ.
މިކަމާއި ގުޅޭގޮތުން "ދެން" އިން ސުވާލު ކުރުމުން ފުލުހުން ގެ މީޑިއާ އޮފިޝަލަކު ވިދާޅުވީ 5 އޮކްޓޯބަރ 2020 ވަނަ ދުވަހު ފުލުހުންނަށް ހުށަހެޅުނު ޑޮމެސްޓިކް ވަޔަލެންސް ކޭސް އެއް ފުލުހުން ދަނީ ތަހުގީގު ކުރަމުން ކަމަށެވެ.
"ދެން" އަށް މައުލޫމާތު ދެމުން އާހިލް ބުނީ އޭނާގެ މައިންބަފައިން ވަރިވީ މީގެ 3 އަހަރު ކުރިން ކަމަށާއި ނަމަވެސް ވަރިވި ފަހުން އޭނަގެ މަންމަގެ ގޭގައި ހުރި ކަމަށެވެ.
"ސޮބާހު އާއި އޭނަގެ އަންހެނުން ޝަރުމީލާ ބޭނުންވީ މުދާ. އެގެއިން މަންމައަށްވީ ބައި ވެސް އެމީހުން ނަގަން ބޭނުން ވަނީ. އެހެންވެ އަޅުގަނޑުގެ ބައްޕައާއި ވަރިކުރުވާފަ ޝަރުމީލާގެ ކޮއްކޮ އަކާއި ކައިވެނި ކުރުވައިގެން މިހާރު އުޅެނީ. އަޅުގަނޑު ދެކެ ރުޅި އަންނަނީ އަޅުގަނޑު ބައްޕައާއި އެއްކޮޅަށް ހިފީމަ. ކުރިން އެގޭގައި ހުރިއިރު ވެސް ބުނި އަނިޔާ ކުރާނަމޭ އެކަމަކު އެއިރު 18 އަހަރު ނުފުރޭތީ އަނިޔާއެއް ނުކުރޭ." އާހިލް ބުންޏެވެ.
އާހިލް އަށް އިންސާފު ދިނުމަށް އެދި އޭނާ މިއަދު ޖެންޑާ މިނިސްޓްރީ އަށް ވެސް ވަނީ ގޮސްފައެވެ.
"ޖެންޑާ އިން ބުނީ މިމައްސަލަ ބަލައިދޭނަމޭ. ދެން ބުނީ އިތުރު އަނިޔާއެއް ލިބުނު ނުދޭން ހިމާޔަތް ވެސް ދެމޭ" އާހިލް ބުންޏެވެ.
އަނިޔާކުރި ބޮޑުބޭބެ އަކީ ފުލުހަކަށްވާތީ، އޭނާއަށް އެއްވެސް ކަމެއް ނުކުރެވޭނެ ކަމަށް ބުނި ކަމަށްވެއެވެ. އެހެންކަމުން އާހިލް އެދެނީ އޭނައަށް އިންސާފު ލިބުމަށެވެ.
