އިންޑިއާގައި ލޮކްޑައުން ތެރޭގައި "ސަމޯސާ" ކާން ބޭނުންވި މީހެއް، ސަމޯސާ ހޯދުމަށް ގުޅީ ކޮވިޑް ހެލްޕްލައިނަށް!
އިންޑިއާގެ އުއްތަރު ޕަރުދޭޝް އަށް ނިސްބަތްވާ މި ފިރިހެން މީހާއަކީ ސަމޯސާ ކެއުމަށް ދެވި ހިފާފައިވާ މީހެކޭ ބުނި ނަމަވެސް ދޮގަކަށް ނުވާނެއެވެ. އިންޑިއާގައި ލޮކްޑައުން އިއުލާން ކުރުމާއި ގުޅިގެން ގެއިން ބޭރަށް ނިކުމެވެން ނެތުމުން ސަމޯސާ ހޯދުމަށްޓަކައި އެހެން މީހުން ގުޅަނީ ސަމޯސާ ފަދަ ކާއެއްޗެހި ވިއްކާ ތަންތަނަށެވެ. ނޫނީ އެފަދަ ކާނާ ވިއްކާ މީހުނަށެވެ. އެހެންނަމަވެސް މި މީހާ ކުރިކަމެއް އެނގޭ ހެއްޔެވެ؟ ސަމޯސާ ހޯދުމަށްޓަކައި ގުޅީ ކޮވިޑާއި ގުޅިގެން ނެރެފައިވާ ހެލްޕްލައިން އަށެވެ. އަދި ގުޅުމަށްފަހު 4 ސަމޯސާ ފޮނުވުމަށް އެދުނެވެ.
ހެލްޕު ލައިނުން ވާހަކަ ދެއްކި އޮފިޝަލް ބުނީ ގުޅިފައި ތި ވަނީ ކޮވިޑު-19 ހެ ހެލްޕްލައިން އަށް ކަމަށެވެ. އަދި އެ ނަންބަރަށް ގުޅާނީ ސިއްހީ ކަމަކާއި ނޫނީ ކޮވިޑުގެ އަލާމާތެއް ފެނުމުން ކަމަށް އޮފިޝަލް އޭނާއަށް ވިސްނައިދެމުން ދިޔައެވެ. އެހެންނަމަވެސް، މި މީހާ ބޭނުންވީ ސަމޯސާއެވެ. ލޮކްޑައުންގެ ސަބަބުން އެހެން ފިހާރަތައް ބަންދުކޮށްފައި ހުރުމުގެ ސަބަބުން އޭނާއަށް ސަމޯސާ ނުކެވުނު ކަމާއި، މިކަމުގައި ދެން ސަރުކާރުން އެހީތެރިވާން ޖެހޭނެ ކަމަށް ބުނެފައިވެއެވެ.
އެހެންކަމުން ހެލްޕުޑެސްކުގެ ބޭފުޅުން ދެން އެމީހާ ގާތުގައި ބުނީ ސަމޯސާ ވިއްކާ ބާޒާރަށް އައުމަށެވެ. ވީ އުފަލުން ވަރަށް އަވަސް ކޮށްލައިގެން މި މީހާ މިސްރާބު ޖެހީ އެ ބާޒާރާއި ދިމާލަށެވެ. ގޮސް ބާޒާރަށް ހުއްޓުމާއި އެކު ފުލުހުންނާއި ބައެއް އޮފިޝަލުން އެތަނުގައި އޭނައަށް އިންތިޒާރުކޮށްގެން ހުއްޓެވެ. ސަމޯސާ ލިބޭނެކަމަށް ހީކޮށް ދިޔަ މީހާއަށް ޖެހުނީ އެތަން ކުނިކަހައި ސާފުކުރާށެވެ. މިއީ މެދުކެނޑުމެއްނެތި ކޮވިޑުގެ ހެލްޕްލައިނަށް ސަމޯސާ ހޯދުމަށް ގުޅި މި މީހާއަށް ފުލުހުން ދިން ހަދިޔާއެކެވެ.
