ނަފްސާނީ ދުޅަހެޔޮކަމުގެ މުހިންމުކަން ކޮވިޑް-19 އާއެކު ދެނެގަނެވިއްޖެ: ރައީސް ޞާލިޙް
ނަފްސާނީ ދުޅަހެޔޮކަމުގެ މުހިންމުކަން ކޮވިޑް-19 އާއެކު ދެނެގަނެވިއްޖެ ކަމަށް ރައީސް އިބްރާއިމް މުޙައްމަދު ޞާލިޙު ވިދާޅުވެއްޖެއެވެ.
މިއަދަކީ ބައިނަލްއަޤްވާމީ ނަފްސާނީ ދުޅަހެޔޮކަމުގެ ދުވަހެވެ. މިދުވަހުގެ ތަހުނިޔާ އަރިސް ކުރައްވަމުން ރައީސް ޞާލިޙު ކުރެއްވި ޓްވީޓެއްގައި ވިދާޅުވީ އާންމު ސިއްޙަތު ކަށަވަރު ކުރުމުގެ އެންމެ މުހިންމު އެއްބަޔަކީ ނަފްސާނީ ގޮތުން ދުޅަހެޔޮކަން މަތީ ހުރުން ކަމުގައެވެ.
ްެއެގޮތުން ކޮވިޑް-19 އާއިއެކު ނަފްސާނީ ގޮތުން ދުޅަހެޔޮ ކަންމަތީ ތިބުމަކީ ކިހާ މުހިންމު ކަމެއްކަން އެނގިގެން ގޮސްފައިވާ ކަމަށް ރައީސް ވިދާޅުވިއެވެ.
ކޮވިޑް-19 ގެ ބަލިމަޑުކަމާއި ގުޅިގެން އެންމެ ގިނައިން ނަފްސާނީ އެހީ ރާއްޖެއިން ދީފައިވަނީ ޒުވާނުންނަށެވެ.
މިޙާލަތުގައި ނަފްސާނީ އެހީތެރިކަން ބޭނުންވާ ފަރާތްތަކަށް އެހީ ފޯރުކޮށްދީފައިވަނީ ސެންޓަރ ފޯރ މެންޓަލް ހެލްތާއި ދިވެހި ރެޑް ކްރެސެންޓް ގުޅިގެންނެވެ.
ރެޑް ކްރެސެންޓުން ބުނެފައިވާ ގޮތުގައި ނަފްސާނީ އެހީތެރިކަން ފޯރުކޮށްދޭ ހޮޓްލައިން 1425 އަށް ގުޅައިގެން 900 ފޯންކޯލްއާއި 44 ގްރޫޕް ސެޝަނާއެކު 2600 މީހުންނަށް އެހީތެރިކަން ފޯރުކޮށްދީފައިވާ ކަމަށެވެ. އޭގެ ތެރޭގައި ވަޒީފާ ގެއްލުނު މީހުންނާއި ބަލީގެ ނުރައްކަލުގެ ސަބަބުން އެހީ ބޭނުންވި މީހުން ވެސް ހިމެނެއެވެ.
