މަގާމުން ދުރުކުރިޔަސް ސިޔާސީ ޙަޔާތް ނުނިންމާނަން: މިނިސްޓަރ ފައްޔާޒް
އިކޮނޮމިކް މިނިސްޓަރ ، ފައްޔާޒް އިސްމާއިލް ގެ އިތުބާރު ނެތްކަމުގެ ވޯޓަކަށް ދާންޖެހޭ ސަބަބެއް ނެތް ކަމަށާއި އެފަދަ ވޯޓަކުން މަގާމުން ދުރުކުރިޔަސް ސިޔާސީ މަސައްކަތުގައި ދެމިހުންނަވާނެ ކަމަށް އެމަނިކުފާނު ރޭ ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމްގައި މިނިސްޓަރ ފައްޔާޒް ބައިވެރިވެފައިވާއިރު އާއްމުންގެ ގިނަ ސުވާލުތައް އަމާޒުވީ، އެމަނިކުފާނު މަގާމުން ދުރުކުރުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ކުރައްވަމުން ގެންދަވާ މަސައްކަތްޕުޅާ ގުޅޭ ގޮތުންނެވެ.
އެގޮތުން އިތުބާރު ނެތްކަމުގެ ވޯޓަކުން މިނިސްޓަރ މަގާމުން ދުރުކޮށްފިނަމަ ސިޔާސީ ކަންކަމުން ދުރަށް ވަޑައިގަންވާނަންތޯ މީހަކު ސުވާލު ކުރުމުން މިނިސްޓަރ ފައްޔާޒް ވިދާޅުވީ ކުރިން އެހާ ސިޔާސީ ކަންކަމުގައި ނޫޅުއްވިޔަސް އިސްލާހީ ހަރަކާތުގެ ތެރެއިން މިހާރު އެކަމުގައި ހިއްސާ ވެވިފައިވާ ކަމަށެވެ. އެހެންކަމުން ވިސްނުން ގެންގުޅުއްވަނީ މި މަސައްކަތުން ރައްޔިތުންނާއި ގައުމަށް ހެޔޮ ގޮތްތަކެއް ހޯއްދަވައި ދެއްވަން ކަމަށް އިކޮނޮމިކް މިނިސްޓަރ ވިދާޅުވިއެވެ.
