އަބީޝޭކް އަރައިގެން އެހުރި ބޫޓުގެ އަގު އެނގިއްޖެ ނަމަ އަންތަރީސް ވާނެކަން ޔަގީން!

ބޮލީވުޑްގެ މަޝްހޫރު ފިލްމީތަރިންނަކީ އާންމުކޮށް އިންޑިއާގެ މަގުތަކުން ފެންނަ ބައެއް ނޫނެވެ. ނަމަވެސް އެތަރިން އިންޑިއާގެ މަގެއްގެ މަތިން ފެނިއްޖެ ނަމަ އެތަރިއަކު އަޅައިގެން ހުންނަ ހެދުމެއްގެ ނުވަތަ އަރައިގެން ހުންނަ ބޫޓެއްގެ އަގަށް ދާންދެން، ނޫސްތަކުގެ ފަލަ ސުރުޙީއަށް އަރައެވެ. މިފަހަރުވެސް ވެފައި މިއޮތީ އެކަހަލަ ގޮތެކެވެ.

Ads by MWSC

އިންޑިއާގެ ނޫހެއް ކަމަށްވާ "ޓައިމްސް އޮފް އިންޑިއާ" ގައި ބުނެފައިވަނީ ބޮލީވުޑްގެ މަޝްހޫރު ފިލްމީ ތަރިއަކު މުންބާއީގެ މަގެއްގެ މަތިން ނުފެންނަތާ ލައްކަ ގިނަ ދުވަސް ވެއްޖެ ކަމަށެވެ. އެހެންނަމަވެސް ފުރަބަންދަށް ލުއިތަކެއް ދިނުމާއެކު ގައިޑްލައިންތަކާއި އެއްގޮތްވާ ގޮތުގެ މަތިން މިތަރިންވެސް ބޭރަށް ނުކުމެ އުޅޭ ކަމަށްވެސް އެ ނޫހުގައި ބުނެފައި ވެއެވެ.

އެގޮތުން ގިނަބައެއްގެ މަގުބޫލުކަން ހޯދާފައިވާ ބޮލީވުޑްގެ މަޝްހޫރު ފިލްމީތަރި އަބީޝޭކް ބައްޗަންް މިވަނީ ގިނަ ބައެއްގެ ލޮލުގައި އަޅައިގަންފައެވެ. ސަބަބަކީ އޭނާ އަޅައިގެންހުރި ހެދުން ކަމުގައި ރިޕޯޓްތައް ބުނެއެވެ. އޭނާ މަތިން ލައިގެން ހުރީ އަޅި ކުލައިގެ ހޫޑީ އެކެވެ. އަދި ތިރިން ލައިގެން ހުރީ ހާކީ ކާގޮސް ކިޔާ ޒާތެއްގެ ފަޓުލޫނެކެވެ.  އަދި އަރައިގެން ހުރީ ހުދު ކުލައިގެ ސްނީކާސް އަކަށެވެ.

އޭނާ ލައިގެންހުރި އަޅި ކުލައިގެ ހޫޑީގެ އަގަކީ 54،000 އިންޑިއަން ރުޕީސްއެވެ. އެމެރިކަން ޑޮލަރުން ނަމަ 753.26 ޑޮލަރެެވެ. އަދި ދިވެހި ރުފިޔާއިން ބަލާނަމަ އެއީ 11،615 ރުފިޔާއެވެ. އެހެންނަމަވެސް އަދި މި ނިމުނީއެއް ނޫނެވެ. އަބީޝޭކްގެ ހޫޑީއަށްވުރެ ބޮޑަށް މީހުންގެ ލޮލުގައި އަޅައިގަތީ އޭނާ އަރައިގެން ހުރި އެޑިޑާސް ބްރޭންޑްގެ ސްނީކާސް ބޫޓެވެ.

މި ބޫޓަކީ އެޑިޑާސްގެ އެންމެ ފަހުގެ މޮޑެލްގެ ބޫޓެކެވެ. އަދި މި ބޫޓަކީ ވަރަށް ގިނަ ދުވަހަށް ހަލާކު ނުވެ ހުންނަ ބޫޓެއް ކަމަށް ވެސް ރިޕޯޓްތައް ބުނެއެވެ. އޭނާ އަރައިގެން ހުރި ސްނީކާސްގެ އަގު އެނގިއްޖެ ނަމަ އަންތަރީސް ވާނެކަން ޔަގީނެވެ. އެ ބޫޓަކީ އެ ސިޓީގައި މިހާރު ލިބެންހުރި އެންމެ އަގުބޮޑު ބޫޓެވެ.

އަބީޝޭކް އަރައިގެން އެހުރި ބޫޓުގެ އަގަކީ 288،483 އިންޑިއަން ރުޕީސްއެވެ. އެމެރިކަން ޑޮލަރުން ބަލާ ކަމުގައި ވަނީ ނަމަ 3950.98 ޑޮލަރެވެ. ދިވެހި ރުފިޔާއިން ނަމަ 60،924.16 ރުފިޔާއެވެ.

މިއީ ބޮލީވުޑްގެ މަޝްހޫރު ތަރި އަބީޝޭކް އަރައިގެންހުުރި ސްނީކާސްގެ އަގެވެ. އަގު އެނގުމުން ކަކުލު ހުޅުން ވާގި ގޮސް، އަންތަރީސް ވެއްޖެ ދޯއެވެ.