މަޖިލީހުގައި މައިންގެ ކޮޓަރިއަކާއެކު މެންބަރުންގެ ތުއްޕުޅު ބޭފުޅުން ބެލެހެއްޓޭނެ އިންތިޒާމެއް!
ރައްޔިތުން މަޖިލީހުގެ އިދާރާގައި މައިންގެ ކޮޓަރިއެއް ގާއިމްކޮށް މެންބަރުން މަޖިލީހުގެ މަސައްކަތަށް ވަޑައިގަންނަވާއިރު، ތުއްޕުޅު ބޭފުޅުން ބެލެހެއްޓޭނެ އެހެެން ގޮތެއް ނެތްނަމަ، މަޖިލީހުގެ އިދާރާއަށް ގެންދަވައިގެން ބެލެހެއްޓޭނެ އިންތިޒާމެއް ހަމަޖައްސައިފިއެވެ.
މިއަދުގެ މަޖިލީހުގެ ޖަލްސާގައި ވާހަކަފުޅު ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، މަޖިލީހުގައި ތުއްޕުޅު ބޭފުޅުން ބެލެހެއްޓުމަށް ހާއްސަ ކޮޓަރިއެއް މިހާރު ހުންނާނެ ކަމަށެވެ. އަދި މެންބަރުން އެދިވަޑައިގަންނަވާ ނަމަ އެތަން ބޭނުން ކުރެއްވޭނެ ކަމަށެވެ. އަދި އެކޮޓަރީގައި ކުޅެވޭނެ އިންތިޒާމު ވެސް ހަމަޖެހިފައި ހުންނާނެ ކަމަށް އެމަނިކުފާނު ފާހަގަ ކުރެއްވިއެވެ.
ރައީސް ނަޝީދު އިތުރަށް ވިދާޅުވީ މި އިންތިޒާމު މަޖިލީހުގައި ހަމަޖެހުނު ނަމަވެސް އެންމެ ރަނގަޅު ގޮތަކީ އާއިލާގެ ގާތުގައި އެކުދިން ބޭތިއްބުން ކަމަށެވެ. އަދި އެކަމަނިކުފާނަށް ވީވަރަކުން އެތާ ބައިތިއްބާފައި ތިބޭ ކުދިން ބައްލަވަމުން ގެންދަވާނެ ކަމުގައި ވެސް ނަޝީދު ވިދާޅުވިއެވެ.
މީގެ އިތުރުން މަޖިލީހުގެ ތަޅުމުގައި މާބަނޑު އަންހެން މެންބަރުންނަށް ވެސް ތިބެވޭނެ ގޮތަކަށް ތަރުތީބު ބަދަލު ކުރަން ޖެހޭ ކަމުގެ މުހިއްމުކަން ވެސް އެމަނިކުފާނުގެ ވާހަކަފުޅުގައި ފާހަގަ ކުރެއްވިއެވެ.
މިހާރު މަޖިލީހުގައި ތިއްބެވީ އެންމެ ހަތަރު އަންހެން މެންބަރުންނެވެ. އެއީ މަޖިލީހުގެ ނައިބު ރައީސް ގަލޮޅު ދެކުނު ދާއިރާގެ މެންބަރު އީވާ އަބްދުﷲ އާއި ތުޅާދޫ ދާއިރާގެ މެންބަރު ހިސާން ހުސެއިން އާއި އައްޑޫ މީދޫ ދާއިރާގެ މެންބަރު ރޮޒައިނާ އާދަމް އާއި ހިންނަވަރު ދާއިރާގެ މެންބަރު ޖީހާން މަހުމޫދެވެ.
Ads by STO
