ޑރ. ބިލާލް ފިލިޕްސް ގެ ހާލުކޮޅު ދެރަވެ އެޑްމިޓު ކޮށްފި ، ބޭނުން ވަނީ އެންމެންގެ ހެޔޮ ދުޢާ!
ދުނިޔޭގެ މަޝްހޫރު ދީނީ ޢިލްމުވެރިޔާ ޑރ. ބިލާލް ފިލިޕްސްގެ ސިއްޙީ ހާލުކޮޅު ދެރަވެ އެޑްމިޓު ކޮށްފިއެވެ.
ޑރ. ބިލާލް ފިލިޕްސް ގެ ރަސްމީ ފޭސްބުކް އެކައުންޓުން މިކަން އިއުލާނު ކުރައްވާ ވިދާޅުވެފައި ވަނީ އޭނާ އާލާސްކަންފުޅާ އުޅުއްވާތާ މިހާރު ދުވަސް ކޮޅެއް ވެއްޖެ ކަމަށާއި އިއްޔެ ހޮސްޕިޓަލެއްގައި އެޑްމިޓު ކޮށްފައިވާ ކަމަށެވެ.
ނަމަވެސް ޑރ. ބިލާލް އެޑްމިޓު ކޮށްފައިވާ ހޮސްޕިޓަލެެއް ހާމަ ކޮށްފައެއް ނުވެއެވެ. ވިދާޅުވީ މިވަގުތު އޮތީ އައިވީ އާއި އޮކްސިޖެން ވެސް ގުޅާފައި ކަމަށާއި މާތް ﷲ ގެ އިރާދަފުޅާއެކު ހާލު ރަނގަޅު ވަމުންވެސް އަންނަ ކަމަށެވެ.
މީގެއިތުރުން ވިދާޅުވެފައި ވަނީ ޑރ. ބިލާލް ކޮވިޑް-19 އަށް މިއަދު ޓެސްޓު ކުރެވޭނެ ކަމަށާއި އޭނާއަށް އަވަސް ޝިފާއެއް ދެއްވުމަށް އެދި އެންމެން ވެސް ހެޔޮ ދުޢާ ކުރެއްވުމަށެވެ.
ޑރ. އަބޫ އަމީނާ ބިލާލް ފިލިޕްސް އަކީ ޤަތަރު ގައި ދިރިއުޅުއްވާ، ކެނެޑާ އަށް އުފަން ބޭފުޅެކެވެ. އޭނާއަކީ އިސްލާމިކް އޮންލައިން ޔުނިވާސިޓީގެ ފައުންޑަރ އަދި ޗާންސެލަރ ވެސް މެއެވެ.
ބައެއް ޤަބޫލުކުރާ ގޮތުގައި ޑރ. ބިލާލަކީ ހަރުކަށި ފިކުރުގެ އަދި ހަރުކަށި ފިކުރު ފަތުރަން މަސައްކަތްކުރާ ފަރާތެކެވެ. އެފަދަ ތުހުމަތުތަކެއްގެ ސަބަބުން އިނގިރޭސިވިލާތާއި، އޮސްޓްރޭލިއާ، ޑެންމާކް، ކެންޔާ، އަދި ޖަރުމަނަށް އޭނާ އެރުން ވަނީ މަނާ ކޮށްފައެވެ. ބަންގްލަދޭޝް ގައި ދިރިއުޅުމުން ދަނިކޮށް، އޭނާއަށް ވަނީ އެޤައުމު ދޫކޮށް ދިޔުމަށް ވެސް އަންގާފައެވެ. މިދިޔަ އަހަރު ރާއްޖެއަށް ދަރުހެއް ދިނުމަށް ވެސް އޭނާ ގެންނަން އުޅުމުން، އެމްޑީޕީއަށް ނިސްބަތްވާ ބައެއް މެންބަރުން އެކަމާއި ދެކޮޅު ހެދުމުން ރާއްޖެއިން ވެސް ވަނީ އޭނާގެ އެދަތުރު ކެންސަލް ކޮށްލާފައެވެ.
މާތް ﷲ ޑރ. ބިލާލް ފިލިޕްސް އަށް އަވަސް ޝިފާއެއް މިންވަރު ކުރައްވާށިއެވެ. އާމީން!
شفا الله
ޑރ ބިލާލަކީ އިސްލާމީ އުއްމަތަށް ލިބިފައިވާ އަގުބޮޑު ޖަވާހިރެއް . އެބޭފުޅާއަށް ރަޙުމަތްލެއްވުންއެދި ހުރިހާ ބޭފުޅުން ދުއާކޮށްދެއްވާ.
“ދާއިމަށް ދިރިދެމިވޮޑިގެންވާ ރަސްކަލާކޮ! ޑރ ބިލާލަށް އަވަށް ޝިފާ ދެއްވާނދޭވެ. އާމީން.”
މާތް ﷲ ޑރ.ބިލާ ފިލިޕްސ އަށ އަވަސް ޝިފާއެއް ދެއްވާށި.امين