އެއް އަހަރުގެ ކުއްޖަކު ޓެކްސީއަކަށް ހޮޑުލުމުން 1000 ރުފިޔާ ނަގައިފި
އެއް އަހަރު ކުއްޖަކު ޓެކްސީއަކަށް ހޮޑުލުމުން 1000ރުފިޔާ ނެގި މައްސަލައެއް ފެންމަތިވެއްޖެއެވެ.
އެކަން ހިނގި ގޮތް ހާމަކޮށް އެ ކުއްޖާގެ މަންމަ ސޯޝަލް މީޑިއާގައި ބުނީ ދަރިފުޅު ހޮޑުލީ މާފުއްޓަށް ފުރަންވެގެން ހުޅުމާލެއިން މާލެ ޖެޓީއަށް ދާން ނެގި ޓެކްސީގައި ކަމަށެވެ.
އެގޮތުން ދަރިފުޅު ހޮޑުލުމުން ޓެކްސީ ދޮންނަން ބޮޑު ހަރަދެއް ދާނެކަމަށް ބުނެ، އެންމެ ފުރަތަމަ 1500ރުފިޔާ ދިނުމަށް އެދުނު ކަމަށް ކުއްޖާގެ މަންމަ ބުންޏެވެ. ނަަމަވެސް ހޮޑު ހުރީ ވަަރަށް ކުޑަކޮށް ސީޓުގައި ހޭކިފައި ކަމަށް ވެސް އޭނާ ބުންޏެވެ. އަދި 1500ރުފިޔާ މާބޮޑުކަމަށް ބުނުމުން ޓެކްސީ ޑްރައިވަރު ވަނީ 1000ރުފިޔާއަށް ކުޑަ ކޮށްދީފައެވެ.
އެ ބެލެނިވެރިޔާ ފަހުން ވަނީ އެ ޓެކްސީ ރަޖިސްޓްރީކޮށްފައިވާ "ނަލަ ޓެކްސީ"އަށް ގުޅައި ޝަކުވާ ހުށަހަޅާފައެވެ. ނަމަވެސް މިހާތަނަށް ވެސް އެ ސެންޓަރުން ވަކި އެއްޗެއް ނުބުނެފައި ނުވާކަމަށް އޭނާ ވަނީ ބުނެފައެވެ.
