"ކޮބާ ކަލޭ؟" ކުރިމަތީގައި ހުއްޓާ ވެސް އެހެން ތިޔަ އަހަނީ ކީއްވެތަ؟
އަހަރެންވާ ރުޅި މަޑެވެ. މީހަކާ ދިމާއަށް އެއްޗެއް ނުބުނެ ވެސް އަހަރެންވާ އެބަ ހުންނަމެވެ. އެކަމަކު މިކަމާ ބެހޭގޮތުން ކޮންމެވެސް އެއްޗެކޭ މިހާރު އެބަ ބުނަން ޖެހެއެވެ. ސުކޫލު ދައުރުގައި އެކުގައި ކިޔަވަން އުޅުނު ރައްޓެއްސަކާ ދިމާވިޔަސް، އެކުގައި ކުރިން ވަޒީފާގައި އުޅުނު މީހަކާ ދިމާވިޔަސް، ރަށު މީހަކާ ދިމާވިޔަސް ހަމަ ގިނަ ފަހަރަށް އަހަނީ މިހެން ވިއްޔާއެވެ. ކުޑަކުޑަ ވާހަކަ އެއް ހިއްސާ ކޮށްލާނަމެވެ.
ކުރިން ދުވަހަކު އެކުގައި ސުކޫލުގައި ކިޔަވަން އުޅުނު ރައްޓެއްސަކާ ފޭސްބުކުން ދިމާވެއްޖެއެވެ. ކޮންމެއަކަސް ދެމީހުން ދުވަހެއް ކަނޑައަޅައި ސައިތައްޓެއް ބޯލަން ދާން ނިންމައިފީމެވެ. ދިޔައީ ކާނިވަލުގައި ހުރި ރެސްޓޯރަންޓަކަށެވެ. ގޮސް ދެމީހުން ވެސް އޯޑަރު ކުރީ ކޮފީ އަކަށެވެ. ދެމީހުން ދިމާވެ ވާހަކަ ދައްކަން ނުފެށިގެން އުޅެނިކޮށް އަހަރެންގެ ރަހުމަތްތެރިޔާ އަހައިފިއެވެ. "ކޮބާ ކައޭ؟" ދެލޯފުޅާ ބުނާކަށް އަހަރެންގެ ގާތަށް އައީ އަމަށަކު ރުޅި އެއް ނޫނެވެ.
ރުޅި ނާންނަންވީ ސަބަބެއް ތިބާ އަޅެ ބުނެބަލާށެވެ. އަހަރެން މި އިނީ އޭނާގެ ކުރިމަތީގައި ވިއްޔާއެވެ. ކުރިމަތީގައި އިންދާ އެ އެހީ އަހަރެން ކޮބައި ހެއްޔޭ ވިއްޔާއެވެ. ރުޅި އައިކަމުގައި ވިޔަސް އެ ރުޅި އަހަރެން އޭނާއަކަށް ނުދައްކަމެވެ. އަހަރެން އޭނާގެ ގާތުގައި ބުނިހާ ވެސް ވާހަކަ އަކީ ވަރަށް ރަނގަޅު ލޮލުގެ ޑޮކްޓަރެއް އޭޑީކޭގައި އިންނަ ވާހަކައެވެ. އަދި އަހަރެންނާ އެ ޑޮކްޓަރު ކުޑަކޮށް ރައްޓެހިވާނެ ވާހަކައެވެ.
އެހެން ބުނުމުން އޭނާއަކަށް އަދި އަހަރެން މި ބުނި އެއްޗެއް ފަހުމެއް ނުވިއެވެ. އޭޑީކޭގައި ލޮލުގެ މާ މޮޅު ޑޮކްޓަރަކު އިނަސް ތިމަންނާއަށް ކޮންކަމެއް ހޭ ބުނެފިއެވެ. އަހަރެން ބުނީމެވެ. އަަަހަރެން ހީކުރީ މިހާރު ކުޑަކޮށް ލޮލުގައި މައްސަލައެއް އުޅެނީ ކަމަށެވެ. މިހެން މިބުނީ އަހަރެން ކުރިމަތީގައި އިންދާ ވެސް އަހަރެން ކޮބައިހޭ އެހީމައެވެ.
މިހެން ބުނުމާއެކު އަަހަރެންގެ އެކުވެރިޔާ ޕަކަޕަކަ އަޅާފައި ހޭން ފަށައިފިއެވެ. އަދި އެއީ ހަމަ ކޮންމެ ރައްޓެއްސެއްގެ ގާތުގައި ވެސް ދިމާވާ އިރަށް އެހޭ އެއްޗެއް ކަމަށް އޭނާ ބުންޏެވެ. އަހަރެންގެ އެކުވެރިޔާ އެކަންޏެއް ނޫނެވެ. އަހަންނަށްވެސް ބައެއް ފަހަރަށް އެހެންވެއެވެ. މަގުމަތިން ރައްޓެއްސެއް ފެންނައިރަށް، "ކޮބާ ކައޭ؟ ގުޅާބަލަ ތިހެން އުޅެފަ ކޮފީއަކަށް" މިހެން ބުނެވެއެވެ. އެކަމަކު އެ ކޮފީއަށް ގުޅޭ އިރެއް ނާންނާނެއެވެ.
އަދި އެއްވާހަކަ ހިއްސާ ކޮށްލާނަމެވެ. އަހަރެން އެއް ދުވަހަކު ވަރަށް މީރުކޮށް، ރިހާކުރާ ބަތާއި ތެލުލިފަތާ ކާން އިންދާ ރައްޓެއްސަކު އަހަރެންގެ ގެއަށް އައިސްފިއެވެ. އަހަރެން އިނީ ނުލާހިކު މީރުކޮށް ކާށެވެ. ކާން އިންދާ ގެއަށް ވަތް ގޮތަށް މީނާ އަހައިފިއެވެ. "ކޮބާ ބުރޯ ކީއް ކޮށްލަނީ؟" އަހަރެން އަޅެ އޭނާއަށް ދޭނީ ކޮން ޖަވާބެއް ހެއްޔެވެ. އަހަރެން ބުނީމެވެ. މިއީ ބަތް އަނގައަށް ލައިފައި ހަފައިގެން ދިރުވަނީއެވެ. އިތުރު ތަފްސީލެއް މިކަމަކަށް ދޮންކަލޯ! ދެވޭކަށް ނެތެވެ.
އަހަރެން އިނީ އޭނާ އައިއިރު ކާން ވިއްޔާއެވެ. އޭނާއަށް އެ މަންޒަރު ފެންނަން ވެސް ފެންނާނެއެވެ. ދެން އަންނަ ގޮތަށް އައިސް ކީއްކޮށްލަނީހޭ އެހުމުގެ ބޭނުމަކީ އަޅެ ކޮބައި ހެއްޔެވެ؟ ބޭކާރު ސުވާލު ގިނަ ކުރާކަށް ނުވާނެޔޭ އިސްލާމް ޓީޗަރުން އަހަރެމެން ސުކޫލުގައި އުޅުނު އިރު ބުނެެއެެވެ.
ހެޔޮނުވާނެއެވެ. އަހަރެންވެސް އަދި ތިބާވެސް ޝާމިލުވާ ހެންނެވެ. ކުރިމަތީގައި މީހަކު ހުއްޓާ "ކޮބާ ކަަލޭ؟" އެހެން ކިޔާ ސުވާލު ކުރުން މިހާރު އަޅެ ހުއްޓާލާ ތަންކޮޅެއް ހަމަ ޖެހޭ ސުވާލު ކުރަން ދަސްކުރަން ވެއްޖެ އެއް ނޫން ހެއްޔެވެ. ނޫންނަމަ، މާދަމާ އެހެން ރުޅިގަދަ މީހަކު ގާތުގައި އަހައިފިނަމަ ބާރުގަދަ އެތިފަހަރެއް މޫނު މަތީގައި ޖެހީމާ ދެރަވާނީ ހަމަ ތިބާއަށެވެ.
އަހަރެންގެ ނަސޭހަތް އަޑުއަހާށެވެ. މިއީ ކުޑަކުޑަ ކަމެކެވެ. މާ ބޮޑުކޮށްލައިގެން މިއުޅެނީ އަހަންނެވެ. އެކަމަކު އަހަރެން ނޫނަސް، މިވާހަކަ ސިއްރުން ދައްކާ މީހުން އެބައުޅެއެވެ. ކޮފީތަކުގައި އާއި ހޮޅު އަށިތަކުގައެވެ. އެކަމަކު އަހަރެން މިހެން މިބުނަނީ އެންމެންނަށް ސާފުވާނޭހެން ފާޅުގައެވެ. އެހެންކަމުން ދެން ވެސް މީހަކު ފެންނަ އިރަށް "ކޮބާ ކަލޭ؟" އޭ ކިޔާ ސުވާލު ކުރާނީ އެއް ނޫނެވެ.
ކައެ މަ ފެނުނިމަ ކޮބާ ބޯ ކޮށާލީ ހޭ އެހީމަ މަ ނުވަން ތި ވަރެއް. ހަބަރަށް އަރުވާ ވަރެއް ނުވޭދޯ އަދިއެއް.
އަޅެ އަދި އެއްކަމެއް. މިކަމަށް ވެސް މިފަދަ ފުރިހަމަ ލިޔުމެއް ލިޔެލަދީބަލަ. މަށަކީވެސް ނޫސް ވެރިއެއް ނަމަ ލިޔެލީމުސް.
“މީހުން މަތިން މިސްވުން” ބަލަ މީހުން މަތިން މިސްއެއް ނުވާނެ. ފަހަރުގަ އާލިމް ނުފެންނާތީ އަހަރެން “އާލިމް މިސްވެދާނެތާ” ދޯ.
އިނގިރޭސި ބަހުން މިކަހަލަ ބަސް ބަހަށް ކިޔަނީ slang.
ދުނިޔޭގެ ހުރިހާ ބަހެށް ގައިވެސް މި ކަހަލަ slang ހުރޭ.
ކޮބާ ކަލޭ އިނގިރޭސި ބަހުން ނަމަ އެންމެ ގާތް ކުރަނީ What’s up މިއާ. މީގެ މާނައަކީ މަތީގައި އޮތީ ކޮން އެއްޗެކޭ ނޫން.
މައްސަލަ އަކީ ވާނުވާ ނޭނގި މާ ރުޅި ގަދަވާން އުޅޭތީ
އަސްލު އެ ސުވާލުގަ އެ ބުނަނީ މިއޮއް ހުރިހާ ދހުވަހު ކޮންތާކު ކިހިނެއްހެއްޔޭ ތި އުޅުނީ