މީހަކު ރޭޕްކުރަން މަސައްކަތް ކުރުމަށްފަހު ފިލި ބަނގްލަދޭޝް މީހަކު ހޯދަނީ
މާލޭގެ ގެއެއްގެ ސިޑި ގޮޅީގައި ފިލާހުރެ، އަންހެނަކު ރޭޕް ކުރަން މަސައްކަތްކޮށް، ފިލި ބަނގްލަދޭޝް މީހަކު ހޯދަން ފަށައިފިއެވެ.
އެނގިފައިވާ ގޮތުގައި މިޒާނުރް ނަމަކަށް ކިޔާ މި ބަނގްލަދޭޝް މީހާ ރޭޕް ކުރަން މަސައްކަތް ކުރީ އުމުރުން 37 އަހަރުގެ އަންހެނެކެވެ. އެއަންހެން މީހާއަށް ހަމަލާދީ ރޭޕް ކުރަން މަސައްކަތް ކޮށްފައިވަނީ ޖަމާލުއްދީން ސްކޫލް ކައިރީގައި ހުންނަ ގެއެއްގައި މިދިޔަ ބުރާސްފަތި ދުވަހުގައެވެ.
އޮންލައިން ނޫސް "ސީއެންއެމް" އަށް މައުލޫމާތު ދެމުން އެއަންހެން މީހާގެ އާއިލާ މީހަކު ބުނެފައި ވަނީ އެ މީހާ އޭނަގެ ދައްތައަށް ހަމަލާ ދީފައިވަނީ އޭނަގެ ދައްތަ ކުނި ކޮތަޅު ހިފައިގެން ތިރިއަށް ފޭބި ވަގުތު ކަމަށެވެ.
"ދައްތަ ފޭބި ގަޑީގައި މީނަ ފަހަތުން މޫނު މަތީގައި ފޮތިގަނޑެއް އޮޅައިގެން ބިން މައްޗަށް ވައްޓާލައިގެން މަސައްކަތް ކުރީ ރޭޕް ކުރަން. އެކަމަކު އެކަމެއް ނުވި" އެމީހާ ކިޔައިދީފައި ވެއެވެ.
އެމީހާ ބުނެފައިވާ ގޮތުގައި އޭނަގެ ދައްތަ ސަލާމަތްވީ އެ ގޭ ކައިރިއަށް ސައިކަލުގައި ދިޔަ މީހުން ތަކެއްގެ ސަބަބުންނެވެ. ނަމަވެސް ހަމަލާ ދިން މީހާ އެވަގުތު ދުވެ ފިލާފައިވާ ކަމަށް ވެސް މައުލޫމާތު ދީފައިވެއެވެ.
މިމައްސަލަ އެ ދުވަހު ފުލުހުންނަށް ހުށަހަޅާފައިވާ ކަމަށާއި ނަމަވެސް މައްސަލައިގެ އިތުރު އަޕްޑޭޓެއް އަދި ލިބިފައި ނުވާ ކަމަށް ވެސް ބުނެފައިވެއެވެ.
މިކަމާއި ގުޅޭގޮތުން "ދެން" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ، ބިދޭސީއަކު ގަދަކަމުން އަންހެނަކާ ބަދު އަޚްލާގީ ޢަމަލު ހިންގަން އުޅުނު މައްސަލައެއް 22 އޮކްޓޯބަރ 2020 ވަނަ ދުވަހު ފުލުހުންނަށް ހުށަހަޅާފައިވާ ކަމަށާއި، މިމައްސަލަ ތަހުގީގު ކުރަމުންދާ ކަމަށެވެ.
ރޭޕް ކުރަން މަސައްކަތް ކުރި ބަންގްލަދޭޝް މީހާއަކީ ކާކުކަން ދެނެގަނެ، އޭނާ ހޯދަން އާއްމުންގެ އެހީއަށް އެދި އަންހެން މީހާގެ އާއިލާއިން ވަނީ ސޯޝަލް މީޑިއާގައި ޕޯސްޓުކޮށްފައެވެ.
