ވަކި ދާއިރާއެއް ހާއްސަކޮށް ބަހުސް ކުރުމަކީ ގާނޫނު އަސާސީގައި މަނާކަމެއް: ރައީސް ނަޝީދު
މަޖިލީހުގެ މެންބަރުން އިންތިހާބު ވަނީ ވަކި ވަކި ދާއިރާތަކުން ނަމަވެސް، ރައްޔިތުންގެ މަޖިލީހުގައި މެންބަރުން ތަމްސީލު ކުރައްވަނީ މުޅި ރާއްޖެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަދު މަޖިލިސް ޖަލްސާގައި ރިޔާސަތުގައި އިންނަވާ ރައީސް ނަޝީދު ވިދާޅުވީ ވަކި ދާއިރާއަކަށް ހާއްސަކޮށްގެން ވާހަކަ ދެއްކުމަކީ ގާނޫނު އަސާސީގައި މަނާ ކަމެއްކަން ހުރިހާ މެންބަރުންނަށް ވެސް ހަނދާން ކޮށްދެއްވާ ކަމަށެވެ.
ދައުލަތުން މިއަދު އަންނަ އަހަރަށް ލަފާކުރާ ބަޖެޓު މަޖިލީހަށް ހުށަހަޅާފައިވާއިރު، މަޖިލިސް ރައީސް ވަނީ ބަޖެޓުގައި ވާ ކަންކަން ވަރަށް ރަނގަޅަށް ބެލުމަށް މެންބަރުންގެ ކިބައިން އެދިވަޑައިގެންފައެވެ.
ނަމަވެސް ބަޖެޓާ ގުޅޭގޮތުން ވާހަކަދައްކަވާއިރު ވަކި ވަކި މެންބަރުން ތަމްސީލު ކުރާ ދާއިރާތަކަށް ހާއްސަކޮށްގެން ވާހަކަ ނުދެއްކުމަށް ނަޝީދު އެދިލެއްވިއެވެ.
"ގާނޫނު އަސާސީގައި މަނާކަމެއް އެއީ ވަކި ދާއިރާގެ ވާހަކައެއް، ވަކި ދާއިރާއަކަށް ހާއްސަކޮށްގެން މެންބަރުން ދެއްކެވުން. މެންބަރުންނަކީ މުޅި ދިވެހިރާއްޖޭގެ ރައްޔިތުންގެ މަޖިލީހުގެ މެންބަރުން،" މިކަން ފާހަގަ ކުރައްވައި ނަޝީދު ވިދާޅުވިއެވެ.
